पैसा नतिरेपछि गण्डकी भौतिक मन्त्रालयको लाइन काटियो

पोखरा- गण्डकी प्रदेश सरकार भौतिक तथा पूर्वाधार विकास मन्त्रालयको बिजुली लाइन काटिएको छ।

विद्युत महसुल नबुझाएको भन्दै नेपाल विद्युत प्राधिकरण पोखरा वितरण केन्द्रले आइतबार बिहान मन्त्रालयको बिजुली आपूर्ति बन्द गरिदिएको हो।

नेपाल विद्युत प्राधिकरण पोखरा वितरण केन्द्रका अनुसार मन्त्रालयले ४ महिनादेखि महसुल तिरेको छैन। पटकपटक ताकेता गर्दा पनि महसुल नबुझाएपछि लाइन काट्नुपरेको प्रमुख राजीवकुमार सिंहले जानकारी दिए।

सिंहका अनुसार मन्त्रालयले मन्त्रालयले १ लाख ५३ हजार रुपैयाँ महसुल बुझाउन बाँकी छ। प्राधिकरणले आइतबार नै जिल्ला कारागारको पनि बिजुली काटेको थियो।

कारागार कार्यालयले करिब २० लाख रुपैयाँ महसुल बुझाउन बाँकी छ।

‘कारागारले एक महिनाभित्र तिर्छौं भनेर कमिट्मेन्ट गरेको छ। सिडिओ साबले नै भन्नुभएपछि जरिमाना तिराएर कारागारमा आपूर्ति गराउन थालेका छौँ,’ उनले सिंहले भने।

तर, मन्त्रालयको बिजुली काटेपनि प्रतिक्रिया भने नआएको सिंहले बताए। ‘मन्त्रालयबाट अहिलेसम्म कुनै कुरा आएको छैन। महसुल नतिर्दासम्म लाइन जडान हुँदैन,’ उनले भने।

उनका अनुसार केही समयअघिसम्म कास्कीका अधिकांश सरकारी कार्यालयले महसुल नतिरेको पाइएपछि बाध्य भएर लाइन काट्नु परेको हो।

यसअवधिमा थुप्रै सरकारी कार्यालयले बक्यौता चुक्ता गरिसकेको सिंहले जानकारी दिए।

उनले भने, ‘मन्त्रीका क्वार्टरहरुमा पनि लाइन काटेका थियौं। अहिले त सबैले तिरिसक्नुभयो।’