नयाँ सहकारी दर्ता गर्न रोक, पुरानाले शाखा विस्तार गर्न नपाउने

काठमाडौँ- सरकारले नयाँ सहकारी संस्था दर्ता र पुराना सहकारीको शाखा विस्तारमा रोक लगाएको छ। कात्तिक २३ गते बसेको मन्त्रिपरिषद् बैठकले नयाँ सहकारी संस्थाको दर्ता र पुरानाको शाखा विस्तारमा अनिश्चितकालीन रोक लगाएको भूमि व्यवस्था, सहकारी तथा गरिबी निवारण मन्त्रालयले जानकारी दिएको छ।

सहकारी संस्थाहरूले ठूलो बचत स्वीकार गर्ने र जोखिमयुक्त क्षेत्रमा लगानी गर्ने प्रवृत्ति बढेकाले नयाँ सहकारी दर्ता र पुरानाको शाखा विस्तारमा रोक लगाइएको मन्त्रालयका प्रवक्ता गणेशप्रसाद भट्टले जारी गरेको विज्ञप्तिमामा उल्लेख छ।

सहकारीमा गम्भीर समस्या सिर्जना भई सम्पूर्ण वित्तीय क्षेत्र नै प्रभावित हुन सक्ने जोखिम बढ्दै गएकोले तत्कालका लागि यो निर्णय गरिएको मन्त्रालयले उल्लेख गरेको छ।

‘यस क्षेत्रको समस्या समाधानका लागि अर्को व्यवस्था नभएसम्म महानगरपालिका, उपमहानगरपालिका र नगरपालिकालाई कार्यक्षेत्र बनाई बचत तथा ऋणको मुख्य कारोबार गर्ने गरी संघ, प्रदेश र स्थानीय तहबाट कुनै पनि प्रकृतिको सहकारी सस्थाको दर्ता, कार्यक्षेत्र विस्तार तथा सेवा केन्द्रको स्वीकृतिमा रोक लगाउने गरी नेपाल सरकार (मन्त्रिपरिषद्) बाट मिति २०८०/७/२३ मा निर्णय भएको बेहोरा सम्बन्धित सबैको जानकारीको लागि अनुरोध छ,’ विज्ञप्तिमा भनिएको छ।