विद्युत्तीय साइकल भनी पैठारी भएका वस्तुलाई विद्युत्तीय स्कुटर सरह वर्गीकरण गर्न आग्रह

काठमाडौं- भन्सार विभागले विद्युत्तीय साइकल भनी पैठारी भएका वस्तुलाई विद्युत्तीय स्कुटर सरह वर्गीकरण गरी जाँचपास गर्न सबै भन्सार कार्यालयलाई अनुरोध गरेको छ । विभागले एक विज्ञप्ती जारी गर्दै विराटनगर भन्सार कार्यालयलगायतका विभिन्न भन्सार कार्यालयमा विद्युत्तीय साइकल भनी पैठारी भएका वस्तुकोे वर्गीकरण स्कुटर सरह गर्न आग्रह गरेको हो ।

पाङ्ग्रा वा चक्का व्यास साधारण साइकलमा जडान भएका भन्दा कम भएको तर मोटाइ साधारण साइकलमा जडान भएका भन्दा मोटा प्रकृतिका भइ दुई वा सोभन्दा बढी पाङ्ग्रा वा चक्का भएका कारणले पनि विद्युत्तीय साइकल भनि पैठारी गरिएका ती साइकललाई स्कुटर सरह नै वर्गीकरण गर्न विभागले आग्रह गरेको छ ।

सवारी साधनमा साधारण साइकलमा प्रयोग हुने जस्तै अतिरिक्त प्याडल वा गति मापन देखाउन सक्ने स्पीडमिटर भएता पनि वा नभएता पनि इलेक्ट्रिक स्कुटर सरह नै वर्गीकरण गर्न भन्सार कार्यालयहरुलाई विभागले अनुरोध गरेको छ ।