लेकसाइडमा सडक महोत्सवको तयारी, संयोजक भन्छन्- ५ लाख पाहुना ल्याउछौँ

पोखरा- पोखरामा सडक महोत्सवका लागि रेस्टुरेन्ट एन्ड बार एसोसिएसन (रेबान) जुटेको छ। अंग्रेजी नयाँ वर्षका अवसरमा पुस १२ देखि १६ गतेसम्म पोखराको लेकसाइडमा हुने सडक महोत्सवको तयारी थालिएको रेबानले जानकारी दिएको छ।

लेकसाइडको फिस्टेल गेटदेखि गैराको चौतारा, जरेबर हुँदै लेकसाइडसम्म ३ किलोमिटर क्षेत्रमा सडकमै महोत्सव हुन्छ। ‘सडकमै खाउँ, सडकमै रमाउँ’ नाराका साथ हुने सडक महोत्सवको २५औं संस्करण हुन लागेको हो।

महोत्सवको रजत वर्षको रुपमा मनाउँदै यसपालि ५ लाख बढी पाहुना भित्र्याउने लक्ष्य लिएको संयोजक विश्वराज पौडेलले बताए। ‘पर्यटन प्रवर्द्धन गर्दै विदेशी मुद्रा आर्जन र रोजगारी सिर्जना महोत्सवको उदेश्य हो’, उनले भने।

महोत्सवको आकर्षणका रुपमा सांस्कृतिक कार्यक्रम, राष्ट्रिय तथा अन्तर्राष्ट्रिय खानाका परिकारको प्रदर्शन, दोहोरी गीत प्रतियोगिता, झाँकी प्रदर्शनीलगायत छन्। रात्रीकालिन कन्सर्ट, बोट रेस, वेटर रेस, टग अफ वार, भलिबल प्रतियोगिता, सडक नाटकसँगै पोखराको पर्यटनको विकास, प्रवर्द्धन अवसर र चुनौती विषयमा बहससमेत हुनेछ।

सडक महोत्सव अन्तर्राष्ट्रियस्तरमै पोखराको पर्यटन ब्रान्ड बनेको पोखरा पर्यटन परिषद्का अध्यक्ष पोमनारायण श्रेष्ठले बताए। ‘साढे ५ लाख पर्यटक आउँछन्। त्यसका लागि हामी कुनै पनि सेवा सुविधा पर्यटकलाई दिन हामी तयार छौं’, उनले भने।