सहकारीको बचत दुरुपयोग गर्ने कानुनको कठघरामा आउँछन् : अर्थमन्त्री महत

रामपुर- अर्थमन्त्री डा. प्रकाशशरण महतले सहकारीको बचत दुरुपयोग गर्ने कानुनको कठघरामा आउने बताएका छन्। शुक्रबार अन्धकारमुक्ति बचत तथा ऋण सहकारी संस्था को रजत महोत्सवमा बोल्दै मन्त्री डा. महतले यस्तो बताएका हुन्।

‘बचतकर्ताको विश्वास दुरुपयोग गर्नेहरु एकक्षणका लागि कानुनको दायराबाट भाग्ला, तर सधैं भाग्न सक्दैन। सर्वसाधारणको बचत दुरुपयोग गर्नेहरु कानुनको कठघरामा आवश्य आउँछन्,’ मेहनत गरेर जम्मा गरेको बचत केही व्यक्तिलाई दुरुपयोग गर्न छुट छैन।’

निजी, सार्वजनिक र सहकारी क्षेत्रको सहभागिता बिना देशको आर्थिक र सामाजिक रुपान्तरण सम्भव नभएको स्पष्ट पार्दै मन्त्री महतले स्थानीयले मेहनत गरेर कमाएको बचत सहकारीमा जम्मा हुने भएकाले सामाजिक रुपान्तरणमा महत्वपूर्ण भूमिका निर्वाह गर्ने बताए।

‘नियमनको अभावमा समस्या आए, तर अन्धकारमुक्ति बचत तथा ऋण सहकारी संस्था उदाहरण बनेको छ, देशैभरि सहकारी यसरी नै उदाहरण बनेर काम गर्नुपर्ने पर्छ,’ उनले भने।

हेर्दाहेर्दै सहकारीको समस्याले विशाल रुप लिएको र कतिपय ठाउँमा ब्राण्डको रुप लिएको बताएका उनले सहकारीका व्यवस्थापकबारे जानकारी नहुने बताए। नियामक निकाय नभएका कारण सहकारीमा समस्या आएको उनको भनाइ थियो।

‘बजेट निर्माणका बेला सहकारी हेर्ने छुटै नियामक निकाय गठनको कुरा गरेको थिएँ, त्यो प्रकृया अगाडि बढेको छ। हामी सबै हेर्न सक्दैनौं राष्ट्र बैंकले भनेको छ,’ उनले थपे, ‘वित्तीय संस्था, माइक्रो फाइनान्स र बैंकभन्दा बाहिर जान सक्ने हाम्रो अवस्था छैन भनेपछि वैकल्पिक नियामक निकाय गठनको तयारीमा हामी गइरहेका छौं।’

अन्धकारमुक्ति बचत तथा ऋण सहकारी संस्था पारदर्शी ढंगले वचतकर्ताको एक–एक पैसाको सुरक्षा सुरक्षा गरेकोमा उनले खुशी व्यक्त गरे। सहकारी संस्थाको रजतमहोत्सवमा बोल्दै मन्त्री डा. महतले भने, ‘यसका स्थानीय ११ हजार सदस्यलाई सन्तुष्ट हुनुहुन्छ, एक पैसा दुरुपयोग हुँदैन भन्नुभयो, एकदमै खुशीको कुरा हो।’