रवि लामिछाने र जीबी राईविरुद्ध सहकारीमार्फत् ठगी गरेको भन्दै उजुरी दर्ता

काठमाडौँ-  सहकारी ठगी प्रकरणमा गोरखा मिडिया नेटवर्कका अध्यक्ष जिबी राई र तत्कालीन एमडी रवि लामिछाने (हाल रास्वपा सभापति) विरुद्ध सहकारी विभागमा उजुरी दर्ता भएको छ।

सहकारी ठगी प्रकरणमा राई र लामिछाने मुछिएको भन्दै आवश्यक छानबिन र कारबाहीको माग गर्दै युवराज सफलले उजुरी दर्ता गराएका हुन्।

‘सहकारी ऐनभन्दा बाहिर गई कारोबार गरी सहकारी सम्बन्धी कसुरमा संलग्न उल्लेखित सहकारीका पदाधिकारी, सञ्चालक र गोरखा मिडिया नेटवर्कका अध्यक्ष जिबी राई र तत्कालीन ग्यालेक्सी टिभीका सञ्चालक र गोरखा मिडिया नेटवर्कका एमडी रवि लामिछानेलाई कानुन बमोजिम हदैसम्मको कारबाही गर्न यो निवेदन पेस गरेको छु’, निवेदनमा उल्लेख छ।

निवेदकले सहकारीबाट कर्जा लिँदा दिँदा गरिएका कर्जा सम्झौताका कागज, कर्जा प्रवाह गर्दा गरिएका सहकारीको निर्णय कर्जा लिनेबारे कम्पनीले गरेको निर्णयको प्रतिलिपि वा सक्कल कागज नै झिकाई आवश्यक अनुसन्धान गर्न माग गरिएको छ।