जाजरकोट भूकम्प : २६ हजार लाभग्राहीले पाए पहिलो किस्ता

त्रिवेणी (रुकुमपश्चिम)- जाजरकोट भूकम्पबाट प्रभावित रुकुमपश्चिमका ६ पालिकाका २६ हजार ५७३ लाभग्राहीले अस्थायी आवास निर्णाणका लागि पहिलो किस्ताबापत २५ हजारका प्राप्त गरेका छन्।

सहायक प्रमुख जिल्ला अधिकारीले प्रवेश बढुवालले सबैभन्दा बढी आठबीसकोट नगरपालिकाका ९ हजार ७३२ र सबैभन्दा कम मुसीकोट नगरपालिकामा ८५८ लाभग्राहीले पहिलो किस्ताबापत रकम प्राप्त गरेको बताए।

उनका अनुसार सानीभेरी गाउँपालिकामा ५ हजार ४३२, त्रिवेणी गाउँपालिकामा २ हजार ७७२, चौरजहारी नगरपालिकामा ६ हजार १६५ र बाँफीकोट गाउँपालिकामा लाभग्राही पहिचान भएका सबै १ हजार ६९९ लाभग्राहीले अस्थायी आवास निर्माण गर्न पहिलो किस्ता प्राप्त गरेका छन्।

उनका अनुसार ६ वटै स्थानीय तहका लाभग्राहीले हालसम्म २५ हजारका दरले ६६ करोड ४३ लाख २५ हजार प्राप्त गरेका छन्। जिल्ला विपद् व्यवस्थापन कोषले २९ हजार ४०६ लाभग्राहीका लागि स्थानीय तह विपद् जोखिम न्यूनीकरण कोषमा ७३ करोड ५१ लाख ५० हजार पठाएको छ। लाभग्राही पहिचान भएका २ हजार ८३३ जनाले अस्थायी आवासको पहिलो किस्ता पाउन अझै बाँकी छ।

जिल्लामा हालसम्म १६ हजार ३४६ अस्थायी आवास निर्माण भएका छन् भने ७ हजार ४९७ अस्थायी आवास निर्माणाधीन रहेको बढुवालले जानकारी दिए। लाभग्राहीको सङ्ख्या आउने क्रम जारी रहेकाले यो सङ्ख्या ३० हजार ५ सय पुग्नसक्ने जिल्ला प्रशासन कार्यालय रुकुमपश्चिमले अनुमान गरेको छ।