महासंघको नयाँ कार्यसमिति चयन गर्न मतदान जारी

नेपाल उद्योग वाणिज्य महासंघको नयाँ कार्यसमिति चयन गर्न मतदान सुरु भएको छ। अपराह्न ४ बजेसम्म जारी हुने मतदान बिहान ८ बजे काठमाडौंको कमलादीस्थित नेपाल प्रज्ञा प्रतिष्ठानमा सुरु भएको हो।

महासंघको कार्यसमिति सदस्यमा चार जना सर्वसम्मत निर्वाचित भइसकेका छन्। एक वरिष्ठ उपाध्यक्ष, तीन उपाध्यक्ष र ५९ जना कार्यसमिति सदस्य चयन गर्न मतदान जारी छ।

महासंघको विधान अनुसार हालका वरिष्ठ उपाध्यक्ष चन्द्रप्रसाद ढकाल ३० चैतदेखि स्वतः महासंघको अध्यक्ष बन्दैछन्। प्रत्येक तीन वर्षमा साधारणसभाबाट नयाँ नेतृत्व चयन गर्ने व्यवस्था महासंघ विधानमा छ।

वरिष्ठ उपाध्यक्ष बन्नका लागि चुनावी मैदानमा उमेशलाल श्रेष्ठ, अन्जन श्रेष्ठ र रामचन्द्र संघई छन्। उनीहरूले प्यानल नै खडा गरी चुनावी मैदानमा होमिएका छन्।

उमेशलाल प्यानलबाट जिल्ला नगर उपाध्यक्ष बन्न उम्मेदवारी दिनेमा दिनेश श्रेष्ठ छन्। यसअघि वरिष्ठ उपाध्यक्षमा उम्मेदवारी घोषणा गरेर अघि बढेका दिनेश श्रेष्ठ उमेशलाल श्रेष्ठ समूहमा आइपुगेका हुन्। यस्तै वस्तुगत उपाध्यक्षका लागि हेमराज ढकालको उम्मेदवार छन्। यो प्यानलमा एसोसिएट्स उपाध्यक्षमा भरत आचार्य उम्मेदवार छन्।

चैत १ गते अञ्जन श्रेष्ठको टिमबाट एसोसियट उपाध्यक्षका लागि उम्मेदवारी घोषणा गरेकी ज्योत्स्ना श्रेष्ठले टिम परिवर्तन गरी रामचन्द्रको प्यानलमा पुगेकी छन्। संघई प्यानलमा जिल्लानगर उपाध्यक्षमा सुरकृष्ण वैद्य र वस्तुगततर्फ सकुन्तलाल हिराचनले उपाध्यक्ष पदका लागि प्रतिस्पर्धामा छन्।

निर्वाचन नजिकिएकै समयमा ज्योत्स्ना टिम छोड्दा अञ्जन श्रेष्ठ समूहलाई अप्ठेरो परेको थियो। अञ्जनको टिमबाट वस्तुगततर्फ मनिषलाल प्रधान, एसोसियटतर्फ भरतराज आचार्य र जिल्ला/नगरतर्फको अरुणराज सुमार्गी उपाध्यक्षका प्रत्यासी छन्।

सात प्रदेशबाट निर्वाचित हुने ७ जना कार्यसमिति सदस्य पदका लागि १७ जना प्रतिस्पर्धामा छन्। कोशी सदस्यका लागि टंकप्रसाद दुलाल, नरेन्द्रकुमार खड्का र तारानाथ घिमिरेबीच प्रतिस्पर्धा हुँदैछ। मधेशबाट विजयकुमार साह र अरुणकुमार प्रधान उम्मेदवार छन्।

बागमती प्रदेशमा कृषिप्रसाद अवाल र सविन श्रेष्ठबीच प्रतिस्पर्धा छ। गण्डकी प्रदेशमा जीवनज्योति श्रेष्ठ र युवराज राजभण्डारी प्रतिस्पर्धामा हुँदा कर्णाली प्रदेशबाट लालमान बूढा, धनबहादुर राउत क्षेत्री र कुलबहादुर विश्वकर्मा मैदानमा छन्। सुदूरपश्चिममा रामबहादुर भण्डारी र जंगबहादुर मल्ल चुनावमा जाँदैछन्।

संस्थापक सदस्य समूहतर्फको सदस्यमा भीष्मप्रसाद न्यौपाने र टीकाराज ढकाल प्रतिस्पर्धामा छन्। उनीहरुमध्ये एक जना चयन हुनेछन्। जिल्ला–नगर, वस्तुगत र एसोसिएटबाट कार्यसमिति सदस्यमा ५१ जना निर्वाचित हुनेछन्।

वस्तुगत संघबाट १४ सदस्य निर्वाचित हुनेमा २८ जना प्रतिस्पर्धामा छन्। जिल्लानगरबाट १८ सदस्य चुनिनेमा ३२ जना मैदानमा छन्। १९ एसोसिएट कार्यसमिति सदस्य बन्न ३० जनाले उम्मेदवारी दर्ता गराएका छन्।

साधारणसभाबाट ६४ सदस्यीय नयाँ कार्यसमिति चयन हुनेछ।