वरिष्ठ उपाध्यक्ष चुन्न महासंघ निर्वाचन दोस्रो चरणमा, रामचन्द्रको मत अञ्जनलाई जाने अनुमान

काठमाडौँ- नेपाल उद्योग वाणिज्य महासंघको वरिष्ठ उपाध्यक्षका लागि पुन: मतदान हुने भएको छ। महासंघको विधानअनुसार वरिष्ठ उपाध्यक्षका निर्वाचित हुन कम्तीमा ५० प्रतिशत मत ल्याउनुपर्ने व्यवस्था भएकाले कुनै पनि उम्मेदवारले आवश्यक मत पाउन नसकेपछि दोस्रो चरणमा प्रवेश गर्ने भएको हो।

पहिलो चरणको मत परिणाम अनुसार अञ्जन श्रेष्ठले सर्वाधिक ३७.९९ प्रतिशत मत ल्याएका छन्। ३१.४९ प्रतिशत मत ल्याउँदै उमेशलाल श्रेष्ठ दोस्रो र ३०.१९ प्रतिशत मत ल्याएका रामचन्द्र संघई तेस्रो भएका छन्। महासंघको विधानअनुसार अब पहिलो हुने अञ्जन र दोस्रो हुने  उमेशलालबीच पुन: प्रतिस्पर्धा हुनेछ। रामचन्द्र भने चुनावी प्रतिस्पर्धाबाट बाहिरिएका छन्।

महासंघमा जिल्ला नगरतर्फ, वस्तुगत र एसोसिएट गरी तीन क्लस्टरमा मतदान हुने गरेको छ। कूल मतभारमा ३० प्रतिशत भार हुने एसोसिएटमा संघईले धेरै मत ल्याएका छन्। १ हजार ६ सय १२ सदर मतमा रामचन्द्र संघईले ६ सय १३, अञ्जन श्रेष्ठले ५ सय ७३ र उमेशलाल श्रेष्ठले ४ सय २६ मत ल्याएका छन्। एसोसियटसतर्फ संघाईले ११.४ प्रतिशत, अञ्जनको १०.६६ प्रतिशत र उमेशलालले ७.९ प्राप्त गरेका थिए।

अर्को कलस्टर जिल्ला नगरतर्फ कुल १ सय १७ मत खसेकोमा १ सय १४ मत सदर भएको थियो। यसमा अञ्जन श्रेष्ठले ४७ मत ल्याएका थिए। त्यस्तै रामचन्द्र संघईले ३९ र उमेशलाल श्रेष्ठले २८ मत ल्याएका पाएका छन्।

महासंघको विधाननुसार जिल्लानगरको मतभार सबैभन्दा बढी ५० प्रतिशत हुन्छ। जसमा अञ्जनले २०.६१ प्रतिशत, उमेशले १२.२८ प्रतिशत र संघईको १७.१० प्रतिशत मत प्राप्त गरेका थिए।

त्यस्तै २० प्रतिशत मात्रै मतभार हुने वस्तुगतमा उमेशलालले ६९, अन्जनले ४१ र संघईले १२ मत ल्याएका थिए। वस्तुगततर्फ उमेशलालले सबैभन्दा धेरै ११.३१ प्रतिशत, अञ्जनले ६.७२ प्रतिशत र संघाईले १.६२ प्रतिशत मत प्राप्त गरेका छन्।

वरिष्ठ उपाध्यक्षका लागि दोस्रो चरणको निर्वाचन तय भएसँगै अञ्जन श्रेष्ठलाई सहज हुने अनुमान गर्न थालिएको छ। संघईलाई गएको कांग्रेसी मत अञ्जनलाई प्राप्त हुने आकलन छ। संघई नेपाली कांग्रेस पार्टी सभापति शेरबहादुर देउवा निकट मानिन्छन्।