काम नगर्ने ‘माननीय ठेकेदार’को फोटो ब्यानरमा, ५ दलले गरे विरोध

मकवानपुर- मकवानपुरको मनहरीमा पुलको ठेक्का लिएर काम नगर्ने नेपाली कांग्रेसका प्रदेश सांसद इन्द्रबहादुर बानियाँको फोटो ब्यानरमा राखेर ५ दलले विरोध प्रर्दशन गरेका छन्।

मनहरीमा पुल निर्माणको ठेक्का लिएर पनि काम नगर्ने बागमतीका सांसद बानियाँसहितका फोटोहरु ब्यानरमा राखेर सत्ता गठबन्धनकै सहयात्री नेकपा माओवादी केन्द्र र नेकपा एससहित एमाले र रास्वपाले विरोध प्रदर्शन गरेका हुन्।

पुल निर्माण गर्नका लागि बानियाँको कम्पनीले ठेक्का लिएपनि काम अति ढिलासुस्ती गरेको, तोकिएको समयमा काम सम्पन्न नगरेकोलगायतका आरोप ५ दलले लगाएका छन्।

बानियाँसहित अरू ठेकेदारको पनि नाम र फोटो राखेर काम सम्पन्न नगरी अलपत्र पारेको निर्माण स्थलमा पाँच दलले प्रर्दशन गरिएको नेकपा एमाले मनहरी गाउँपालिकाका अध्यक्ष नविन सुवेदीले जानकारी दिए।

मकवानपुरको मनहरी गाउँपालिकामा एकपछि अर्को अनियमितताका विषयमा पाँच राजनैतिक दलहरुले ध्यानाकर्षण गराए पनि पालिकाले कुनै पनि चासो नदेखाएकाले ठेकेदारको फोटोसहित विरोध गर्नुपरेको ५ दलको भनाइ छ।

मनहरी गाउँपालिकामा कर्मचारी र जनप्रतिनिधिहरुको मिलेमतोमा नदिजन्य पदार्थमा गरिएको राजस्व छुटलगायतका विषयमा पनि पाँच दलका नेताहरुले संयुक्त रुपमा हस्ताक्षर गरेर गाउँपालिकाको ध्यानाकर्षण गराएका थिए।

मनहरी गाउपालिकामा भैरहेको योजनाहरूको ढिलासुस्ती, पाँच वटा पुल निर्माणमा भइरहेको ढिलाइ, गाउँपालिकामा भइरहेको निरन्तरको अनियमितता लगायतका विषयमा पाँच राजनैतिक दलले संयुक्त रुपमा ध्यानाकर्षण गराईए पनि चासो नदिएपछि चरणबद्ध आन्दोलनमा उत्रिएको अध्यक्ष सुवेदीले बताए।