श्रमका समस्याबारे अध्ययन गर्न समिति गठन, २१ दिनको म्याद

काठमाडौँ- श्रम, रोजगार तथा सामाजिक सुरक्षा मन्त्रालयका मन्त्री डोलप्रसाद (डीपी) अर्यालले समिति गठन गरेका छन्।

श्रम मन्त्रालयसँग सम्बन्धित देखिएका विवादबारे अध्ययन गर्न प्रवक्ता सहसचिव गोविन्दप्रसाद रिजालको संयोजकत्वमा तीन सदस्यीय समिति गठन गरेका हुन् ।

समितिले अध्ययन गरेर प्रतिवेदन पेस गरेपछि ती निर्णय तथा विवादहरूको समीक्षा गरेर निर्णय कार्यान्वयन गरिने मन्त्रालयले जनाएको छ।

समितिमा २१ दिनको समय दिइएको छ। वैदेशिक रोजगारी व्यवस्थापनसँग सम्बन्धित विभिन्न विषयहरुमा विवाद देखिएको छ।

पूर्वप्रस्थान अभिमुखीकरण तालिमको शुल्क, वैदेशिक रोजगारीमा जाने दक्ष श्रमिकका लागि अंग्रेजी भाषा आवश्यक हुने सम्बन्धी विषय, दक्षिण कोरियामा इपिएस प्रणालीबाट कामदार पटाइरहेको अवस्थाका बिच इ–सेभन (ई७) भिसामा समेत कामदार पठाउने लगायतका विषयमा विवाद देखिएको हो।

त्यस्तै विभिन्न देशबाट कामदार माग भई आएकोमा मन्त्रालयबाट गठन भएको समितिबाट माग प्रमाणीकरण गर्ने विषय समेत विवाद देखिएको छ। यी विषयहरूमा सञ्चारमाध्यम, कामदार तथा श्रमिक स्वयंबाट समेत गुनासो आएको मन्त्रालयले जनाएको छ।

श्रमका समस्या समाधान गर्न गत पुस १६ गते तत्कालीन श्रममन्त्री शरदसिंह भण्डारीलाई प्रधानमन्त्री पुष्पकमल दाहालले १६ बुँदे निर्देशन दिएका थिए।