मिटरब्याजीले फिर्ता गरे ११ करोड रुपैयाँ, २० बिघा जग्गा

काठमाडौँ – अनुचित लेनदेनमा कारोबार गर्ने (मिटरब्याजी)ले ऋणीबाट असुल गरेको ११ करोड रुपैयाँ र २० बिघा जग्गा फिर्ता गरेका छन्। महोत्तरी प्रहरीले हालसम्म दर्ता भएका निवेदन माथी छलफल गरेर उक्त परिणामको  जग्गा र नगद फिर्ता गराएको हो। 

जिल्ला प्रहरी कार्यालय महोत्तरीका प्रवक्ता डिएसपी दिलिपकुमार गिरीका अनुसार पीडितले दिएको निवेदनमाथि छलफल गरी ११ करोड १५ लाख ४ हजार ९२ रुपैयाँ फिर्ता गराइएको हो भने मिटरब्याजीहरूले कब्जा गरेका २० बिघा १३ धुर जमिन समेत पीडितले फिर्ता पाएका छन्।

जिल्ला प्रहरी कार्यालय महोत्तरीमा हालसम्म अनुचित लेनदेन सम्बन्धित २ हजार ८ सय ३० वटा निवेदन दर्ता भएको छ।

तीमध्ये १ हजार ३ सय ३९ वटा निवेदनमाथि छलफल भएको र ७५९ वटा मिलापत्र भएको प्रवक्ता डिएसपी गिरीले जानकारी दिए। 

गत फागुन महिनामा मात्रै १८६ वटा छलफल भई १ सय ५५ वटा मिलापत्र गराइएको र त्यसबाट ४ करोड ९० लाख ११ हजार ३३४ रुपैयाँ फिर्ता भएको छ। सोही अवधिमा ७ बिघा १३ धुर जमिन समेत पीडितले फिर्ता पाएको प्रहरीले जनाएको छ।