सहकारी ठगीमा गृहमन्त्री रवि लामिछानेमाथि छानबिन गर्नुपर्छ : गगन थापा

काठमाडौँ- नेपाली कांग्रेसका सांसद गगनकुमार थापाले सहकारी ठगी प्रकरणमा नाम मुछिएका गृहमन्त्री रवि लामिछानेमाथि पनि छानबिन गर्नुपर्ने बताएका छन्।

सोमबार प्रतिनिधिसभा बैठकको आकस्मिक समयमा बोल्दै सांसद थापाले पोखराको सूर्यदर्शन सहकारीको सदस्य नै नभएपनि गृहमन्त्री रवि लामिछानेले गैरकानुनी रूपमा एक करोड रुपैयाँ लिएको आरोप लागेकाले यसमा छानबिन हुनुपर्ने बताएका हुन्।

रवि लामिछानेले ‘आफूले पैसा लिएको छैन र आफू सहकारीको सदस्य होइन’ भनेको भरले उन्मुक्ति पाए अर्बौं रुपैयाँ ठग्ने अरु सय जनाले पनि उन्मुक्ति पाउने उनको भनाइ छ।

लामिछाने र सूर्यदर्शन सहकारीमाथि अनुन्धान नगर्ने हो भने अन्य धेरै सहकारीलाई पनि छोड्नुपर्ने भएकाले सबैलाई छानबिनको दायरामा ल्याउन माग गरेका हुन्।

गृहमन्त्रीमाथि प्रहरीले अनुसन्धान गर्ने कुरामा उनले आशंका व्यक्त गरे। उनले यो प्रकरणको सम्बन्धमा प्रहरीको जवाफको माग गरे।

यस्तो छ थापाको भनाइ
सहकारी ठगी प्रकरणमा गृहमन्त्री आफै मुछिनुभएको छ। अब यसको निष्पक्ष छानबिन हुन्छ भनेर हामीले कसरी विश्वास गर्ने ? प्रहरीले अनुसन्धान गर्दा त शक्तिशाली नेताहरूलाई नछुने रहेछ। जीवी राई, दीपेश पुनसहितको समूहले अर्बौँ अपचलन गरेको छ त्यसमध्येको सबैभन्दा धेरै पैसा ग्यालेक्सी टेलिभिजनमा गएको रहेछ।

मैले थाहा पाएसम्म अझै धेरै शक्तिशाली नेताहरूको नाम आउँछ। राम्रोसँग अनुसन्धान हुने हो भने। त्यसैले अनुसन्धान नियमित ढंगले प्रहरीले गर्न सक्छ भनेर हामीले कसरी पत्याउनेरु सहकारी ठगीमा कुनै एउटा प्रमाण नास नहोस्। अहिले प्रमाणहरू प्रहरीसँगै छ। पीडितहरूले जम्मा गरेर दिएका छन्। जो मुछिएको छ त्यसले अनुसन्धान गर्छ भनेर कसरी पत्याउने ? प्रधानमन्त्रीबाट हामीलाई जवाफ चाहिएको छ। हामीलाई ओठे जवाफ होइन। जिम्मेवारी बोधसहितको चाहिन्छ।

म गृहमन्त्रीलाई पनि आग्रह गर्न चाहन्छु यसलाई टुंग्याउन दिऔँ। दूधको दूध पानीको पनि हुन दिऔँ। नखाएको विष लाग्न हुँदैन। त्यसको पीडा मैले पनि भोगेको छु। यदि विष नखाएको छ भने लाग्न हुँदैन। हामी कसैले पनि न्यायाधीश बनेर त दोषी भन्न हुँदैन।

पोखराको सूर्यदर्शन सहकारी करिब १९ हजार मानिसको १ अर्ब ३५ करोडभन्दा बढी पैसा अपचलनमा परेको छ। पोखरा महानगरपालिकाले अध्ययन गर्यो। अध्ययनको ८९ पेजको रिपोर्ट निकाल्यो। रिपोर्टले भन्यो सय जना मानिसहरुले नक्कली खाता खोलेर करिव १ अर्ब ३५ करोड रुपैयाँ अपचलन गरेका छन्।त्यो रिपोर्टको ७८ औँ पृष्ठमा के भन्छ भने यसरी नक्कली खाता खोल्ने मानिसहरु मध्येको एउटा नाम हो रवि लामिछाने।

माननीय गृहमन्त्री रवि लामिछाने माननीय हुनुहुन्छ। भोलि प्रधानमन्त्री बन्नुहोला। शुभकामना छ, बन्न पनि सक्नुहुन्छ। अलग विषय हो। तर रवि लामिछानेले एक करोड रुपैयाँ लिनुभएको छ। सहकारीको सदस्य हुनुहुन्न। हाम्रो कानुनको दफा ५० ले भन्छ यो गैरकानूनी छ।

मैले उहाँको स्पष्टिकरण सुनेँ। ३ मिनेट २० सेकेण्डको थियो। मैले राम्रो सँग सुनेँ, पढेँ पनि। स्पष्टीकरणमा भनिएको छ, कसैले मेरो नाम लग्यो होला मलाई थाहा छैन। सहकारीको सदस्य होइन, कसैले मेरो नाम लग्यो होला। यदि यस्तै मान्ने हो भने सय जना नै मानिसहरुले एक अर्ब रुपैयाँ लगेको प्रकृति ठ्याक्कै यही हो। कसैको धितो छैन। कोही सहकारीको सदस्य होइन। कुनै प्रक्रिया पुर्या‍इएको छैन। एक अर्ब झ्वाम्म।

यसरी छोड्दिने हो भने एकजनालाई मात्रै छोडेर हुँदैन अब। सबैलाई छोड्नुपर्छ। एउटा सहकारीको मात्र छोडेर हुँदैन, सबै सहकारीलाई छोड्नुपर्छ। सरकार यही गर्न तयार हो ? मेरो प्रधानमन्त्रीलाई प्रश्न छ।