मुख्यमन्त्री सोडारीविरुद्ध सर्वोच्च पुगे लक्ष्मण चौधरी

काठमाडौँ- सुदूरपश्चिमका मुख्यमन्त्री दीर्घराज सोडारीविरुद्ध नागरिक उन्मुक्तिका सांसद लक्ष्मणकिशोर चौधरी सर्वोच्च अदालत पुगेका छन्।

एकीकृत समाजवादीका संसदीय दलका नेता सोडारीको मुख्यमन्त्री नियुक्ति बदर माग गर्दै चौधरी रिट लिएर सर्वोच्च पुगेका हुन्।

तत्कालीन मुख्यमन्त्री कमलबहादुर शाहले राजीनामा दिएपछि प्रदेश प्रमुखले संविधानको धारा १६८ (२) अनुसार सरकार गठनका लागि दाबी पेस गर्न २ वैशाखसम्म समय दिएका थिए। नाउपाका सांसद चौधरीले नेपाली कांग्रेस र एकीकृत समाजवादीका संसदीय दलको नेताको समर्थनसहित १ वैशाखमा दाबी पेस गरेका थिए।

यस्तै नाउपाकै कैलाश चौधरीले एमाले र माओवादीका संंसदीय दलको नेताको समर्थनसहित दाबी पेस गरेका थिए। दुवैको दाबीमा कुनै निर्णय नगरी फेरि मुख्यमन्त्रीमा दाबी गर्नका लागि प्रदेश प्रमुख समय दिएका थिए।

प्रदेश प्रमुख नजिर मियाँले ४ गते दुवैको दाबीलाई अस्वीकृत गर्दै मुख्यमन्त्रीमा दाबी गर्न थप दुई दिन समय दिएका थिए।

सत्ता गठबन्धनमा भएको सहमति अनुसार त्यही समयमा सोडारीले नाउपाका चौधरीलाई दिएको समर्थन फिर्ता लिए भने ६ गते एमाले, माओवादी, नाउपा (रञ्जिता श्रेष्ठ पक्ष) समेतको समर्थनमा मुख्यमन्त्रीमा दाबी पेस गरे। प्रदेश प्रमुखले त्यही दिन सोडारीलाई मुख्यमन्त्री बनाएका थिए।

नाउपाका लक्ष्मणकिशोरले भने आफूले बहुमत सांसदको समर्थनसहित दाबी पेस गरेकाले मुख्यमन्त्री नियुक्त गर्नुपर्ने जिकिर गरेका छन्।