बैंक तथा वित्तीय संस्थाका कार्यालय तथा कर्मचारीमाथि भएको आक्रमणप्रति सिबिफिनको आपत्ति

मंगलबार हेटौडास्थित कुमारी बैंकको कार्यालयमा भएको आन्दोलनप्रति बैंक तथा वित्तीय परिसंघ नेपाल (सिबिफिन)ले विरोध जनाएको छ।

उक्त कार्यालयमा प्रदर्शनकारीहरुले बैंकिङ सेवा अवरुद्ध गर्ने, सेवाग्राहीलाई बैंकिङ सेवा लिनबाट वञ्चित गर्ने, धरपकड गर्ने,कार्यालय नै बन्द गर्न पत्र पठाउने र धम्की दिने लगायतका गतविधि भएको भन्दै यस्ता गलत कार्य रोक्न नेपाल सरकार, गृह प्रशासन तथा नेपाल राष्ट्र बैंकलाई परिसंघले आग्रह गरेको छ।

बैंक तथा वित्तीय संस्थाहरुका कार्यालय र बैंकका कर्मचारीहरुमाथि भइरहेको आक्रमणप्रति  परिसंघले खेद प्रकट गरेको छ।
कोभिड १९ र रुस युक्रेन युद्धका कारण विश्व अर्थतन्त्र नै संकटमा रहेको समयमा सुनियोजित ढंगबाट बैंक तथा वित्तीय संस्था लक्षित  अवाञ्चित गतिविधिप्रति परिसंघले सरोकारवाला सबैको ध्यानाकर्षण गराएको छ।
अर्थतन्त्रमा देखिएको संकट समाधान गर्न नेपाल सरकार, उद्यमी/व्यवसाय र सर्वसाधारण समेत एकजुट भएर अगाडी बढ्नुपर्न समयमा बैंकिङ प्रणालीमाथि नै प्रभाव पार्ने गरि भइरहेका यस्ता गतिविधि रोक्न नेपाल सरकार तथा गृह प्रशासनलाई परिसंघले आग्रह समेत गरेको छ।

सरकारले बैंकिङ सेवालाई अत्यावश्यक सेवाको सुचीमा राखेकाले यस क्षेत्र लक्षित प्रर्दशन अनुचित रहेको सिबिफिनले विज्ञप्तिमा उल्लेख गरेको छ।

परिसंघले असन्तुष्ट पक्षलाई सबै समस्याको समाधान वार्ता तथा संवादको माध्यमबाट गर्न आग्रह गरेको छ। बैंक तथा वित्तीय संस्थाका शाखा कार्यालयमा भएका धर्ना, धरपकड र कार्यालय नै बन्द गर्ने जस्ता अनुचित कार्य छोडेर वर्तामा आउन उसले आग्रह गरेको छ। यसको नेतृत्व गरिदिन परिसंघले नेपाल सरकार, गृह मन्त्रालय, नेपाल राष्ट्र बैंक, सुरक्षा निकाय र सम्बन्धित व्यावसायलाई समेत अपिल गरेको छ।