देशको कुल निर्यात भन्दा पेट्रोलियम पदार्थको मात्र आयात दोब्बर

काठमाडौँ- चालु आर्थिक वर्षको ९ महिनामा देशको कुल निर्यात भन्दा झन्डै दोब्बर रुपैयाँ बराबरको पेट्रोलियम पदार्थ मात्र आयात भएको छ।

भन्सार विभागको तथ्याङ्क अनुसार चालु आर्थिक वर्षको नौ महिना (साउन–चैत) मा नेपालबाट १ खर्ब १३ अर्ब रुपियाँको निर्यात हुँदा झन्डै दोब्बर रकम २ खर्ब १० अर्ब रुपियाँको पेट्रोलियम पदार्थ आयात भएको छ।

९ महिनामा निर्यात ३ प्रतिशतले घटेर १ खर्ब १३ अर्ब ९४ करोड ६० लाख रुपियाँमा झरेको छ। ९ महिनामा पेट्रोलियम पदार्थको आयात गत वर्षको तुलनामा घटे पनि कुल निर्यातको तुलनामा झन्डै दोब्बर रहँदै आएको छ।

गत आवको सोही अवधिमा २ खर्ब २३ अर्ब १५ करोड ९४ लाख रुपियाँ बराबरको पेट्रोलियम पदार्थ आयात भएको थियो। आन्तरिक बजारमा पेट्रोलियम पदार्थको माग कम हुँदा आयातमा कमी आएको छ।

विभागले नौ महिनाको अवधिमा १ खर्ब ३ अर्ब रुपियाँको डिजेल आयात भएको छ। यस्तै सो अवधिमा ५० अर्ब २५ करोडको पेट्रोल र ४१ अर्ब रुपियाँ बराबरको एलपी ग्यास आयात भएको छ। यस्तै १५ अर्ब ६१ करोडको हवाई इन्धन आयात भएको छ।

चालु आवमा पेट्रोलियम पदार्थ आयातबाट सरकारलाई ७८ अर्ब ८२ करोड ६२ लाख १४ हजार राजस्व सङ्कलन भएको छ। गत आवको सोही अवधिमा सरकारले ७५ अर्ब पाँच करोड ४३ लाख ८३ हजार रुपियाँ राजस्व सङ्कलन गरेको थियो।

भन्सार विभागका अनुसार चालु आवको ९ महिनामा ५० अर्ब २५ करोड ३९ लाख १८ हजार बराबरको ५ लाख ६ हजार १५९ किलोलिटर पेट्रोल आयात भएको छ। सरकारलाई १८ अर्ब ९५ करोड ४७ लाख १९ हजार रुपियाँ राजस्व प्राप्त भएको सङ्कलन भएको छ।

यस्तै नौ महिनामा एक खर्ब तीन अर्ब २२ करोड ८४ लाख १५ हजार रुपियाँ बराबरको नौ लाख ८६ हजार ९५० किलोलिटर डिजेल आयात भएको छ। डिजेल आयातमा सरकारलाई ३९ अर्ब ९८ करोड १२ लाख ४२ हजार राजस्व प्राप्त भएको छ।

नौ महिनाको ४१ अर्ब ७६ करोड ४६ हजार रुपियाँ बराबरको ३९ करोड २३ लाख छ हजार ३०२ किलो एलपी ग्यास आयात भएको हो। जसबापत सरकारलाई सात अर्ब ६४ करोड ९५ लाख ३० हजार रुपियाँ सङ्कलन राजस्व आएको छ।