सहकारी ठगीको छानबिन गर्ने संसदीय समिति बनाउन विपक्षी दलहरू एकमत

काठमाडौँ- सहकारी ठगीको छानबिन गर्ने संसदीय समिति बनाउन विपक्षी दलहरू एकमत भएका छन्।

शुक्रबार नेपाली कांग्रेसको आयोजनामा भएको विपक्षी दलका शीर्ष नेताको बैठकले छानबिन समिति बनाउने कुरामा सहमति जुटाएको हो। अबदेखि कांग्रेसको मागलाई अन्य विपक्षी दलले पनि साथ दिने भएका हुन्।

कांग्रेसका साथै राष्ट्रिय प्रजातन्त्र पार्टी, जनता समाजवादी पार्टी नेपाल र लोकतान्त्रिक समाजवादी पार्टीका शीर्ष नेताले यस्तो निर्णय गरेका हुन्।

बैठकले बिहीबार सभामुख देवराज घिमिरेले विपक्षीलाई पेलेर अगाडि बढ्न खोजेको विषयलाई पनि उठाउने भएको छ। शुक्रबार एमाले र कांग्रेसका सांसदहरूबीच सदनमा धकेलाधकेलमा उत्रिएका थिए।

सभामुखले गृहमन्त्री रवि लामिछानेलाई बोल्न समय दिएपछि विरोध गरिरहेका कांग्रेसका सांसदहरूलाई हट्नका लागि एमाले अध्यक्ष ओलीले निर्देशनपछि धकेलाधकेलको स्थिति आएको कांग्रेसको भनाइ छ।

संसदमा प्रतिपक्षले विरोध गरिरहेका बेला पेलेर जानका लागि सभामुले गृहमन्त्रीलाई बोल्ने समय दिएर सभामुखले बैठकमा मुठभेडको स्थिति सिर्जना गर्न खोजेको कांग्रेसको आरोप छ।

विपक्षी दलहरूले उक्त घटनाबारे सभामुखलाई संयुक्त रूपमा ध्यानाकर्षण गराउने निर्णय गरेका छन्।

सहकारी ठगीमा गृहमन्त्री रवि लामिछाने संलग्न रहेको आरोप लगाउँदै प्रमुख प्रतिपक्ष दल नेपाली कांग्रेसले लगातार संसदीय छानबिन समितिको माग गर्दै आएको छ।

सत्तारुढ दल नेकपा एकीकृत समाजवादीले सहकारीको बचत अपचलनबारे छानबिन समिति गठनको माग गरेको छ। सत्तारुढ अन्य दलहरू छानबिन समिति बनाउन तयार नभइरहेको बेला सत्तारुढ घटक नेकपा एसको केन्द्रीय कमिटी बैठकले नै छानबिन समिति गठनको माग गरेको हो।