ओली र प्रचण्डले रविलाई बालुवाटार बोलाए

काठमाडौँ- नेपाली कांग्रेसको मागबारे छलफल गर्नका लागि भन्दै प्रधानमन्त्री पुष्पकमल दाहालले नेकपा एमालेका अध्यक्षलाई बोलाएर बालुवाटारमा छलफल गरेका छन्।

ओलीसँग छलफल गरेपछि थप छलफलका लागि प्रचण्ड र ओलीले रास्वपाका सभापतिसमेत रहेका उपप्रधान तथा गृहमन्त्री रवि लामिछानेलाई पनि बालुवाटार बोलाएका छन्।

ओली र प्रचण्डले छलफल गरेर बोलाएपछि लामिछाने पनि बालुवाटार पुगेका छन्।

शनिबार बिहान सदनको गतिरोध हटाउने विषयमा कांग्रेस नेताहरूसँग भएको छलफलबारे ब्रिफिङ गर्न प्रधानमन्त्री प्रचण्डले रवि र ओलीलाई बोलाएका हुन्।

प्रचण्डले बिहान कांग्रेसका नेताहरूसँग छलफल गरेका थिए। सो छलफल सकारात्मक भएको कांग्रेस नेताको दाबी छ।

कांग्रेस सभापति शेरबहादुर देउवा, उपसभापति खड्का, महामन्त्री गगन थापा, प्रमुख सचेतक रमेश लेखकसहितका नेता बालुवाटारमा पुगेका थिए।

बिहीबार नै कांग्रेसका जीवन परियारसँग रास्वपाका स्वर्णिम वाग्लेले एउटा ड्राफ्ट बनाएर पठाएका थिए। तर वाग्लेको प्रस्तावमा परियारले कांग्रेसमा छलफल गरी छानबिन समितिको टीओआरमा रवि लामिछानेको पनि नाम समावेश गरी फर्वार्ड गरेका थिए।

लामिछानेको नाम राख्ने विषय कांग्रेसले प्रस्ताव गरेसँगै उक्त विषयबाट रास्वपा पछि हटेको परियारले बताए।

सो कुरा नमिलेपछि शुक्रबार पुनः नयाँ बुँदासहित केही विषय संशोधन गरिएको स्रोतको दाबी छ। प्रधानमन्त्री प्रचण्डले सहमतिका नयाँ बुँदाबारे शनिबार बिहान कांग्रेस नेताहरूलाई जानकारी गराएका छन्।

कांग्रेसले लगातार सहकारी प्रकरणमा संसदीय छानबिन समिति बनाउनुपर्ने माग राख्दै संसदको दुवै सदन अवरोध गर्दै आएको छ।

अवरोधकैबीच गत बिहीबार प्रतिनिधिसभामा सत्तारुढ र प्रतिपक्षी दलका नेताहरूबीच धकेलाधकेल भएको थियो।

कांग्रेसले टीओआरमा रवि लामिछानेको नाम राख्नैपर्ने अडान लिँदै आएको छ।