बालुवाटारमा भेला भए शीर्ष नेता

काठमाडौँ- प्रमुख दलका शीर्ष नेताहरूको बैठक सुरु भएको छ।

प्रधानमन्त्री निवास बालुवाटारमा सुरु भएको बैठकमा प्रधानमन्त्री पुष्पकमल दाहाल प्रचण्ड, नेकपा एमालेका अध्यक्ष केपी शर्मा ओली, कांग्रेस नेताहरू कृष्ण सिटौला, गगन थापा, रमेश लेखकलगायत सहभागी छन्।

बैठकमा पछिल्लो राजनीतिक घटनाक्रम र संसद्को अवरोधबारे छलफल भइरहेको छ।

कांग्रेसले उपप्रधान एवं गृहमन्त्री रवि लामिछानेमाथि छानबिन गर्नका लागि संसदीय छानबिन समिति गठनको माग गर्दै आइरहेको छ। कांग्रेसको मागमा अन्य विपक्षी दलहरूले पनि साथ दिएका छन्।

संसदीय समितिको कार्यादेश बनाउन पटकपटक बसेको बैठकले कुनै पनि निष्कर्ष निकाल्न सकेको छैन।

शुक्रबार बिहानको बैठकमा संसदीय समितिको कार्यादेश (टीओआर)मा रविको नाम नराखे सहकारीहरूको नाम समेटेर कार्यादेश बनाउन कांग्रेसले प्रस्ताव गरेको छ।

नेपाली कांग्रेसले नयाँ प्रस्ताव ल्याएपछि शीर्ष नेतासँग छलफल गर्ने भन्दै सत्तापक्षका कार्यदलका सदस्यहरू बैठकबाट उठेका थिए।