प्रचण्ड संघीयताको घोर विरोधी हुन् : मुख्यमन्त्री यादव

धनुषा– मधेस प्रदेशका मुख्यमन्त्री सरोजकुमार यादवले प्रधानमन्त्री पुष्पकमल दाहाल संघीयताको घोर विरोधी भएको अरोप लगाएका छन्। सोमबार आर्थिक वर्ष २०८०/०८१ को स्थानीय तहलाई दिने सःशर्त अनुदान वितरण तथा विभिन्न मन्त्रलायबाट हुने रकमान्तरको सम्बन्धमा नेकपा एमाले, जनमत पार्टी, नेकपा (माओवादी केन्द्र) र लोकतान्त्रिक समाजवादी पार्टी, नेपालले मुख्यमन्त्रीको ध्यानाकर्षण गराएसँगै उनले सञ्चारकर्मीहरुसँग यस्तो आरोप लगाएका हुन्।

‘देशभर मधेश प्रदेशले संघीयता चाहेको हो। यो डेढ वर्षमा संघीयता चाहिन्छ भनेर बढी लड्ने म नै हो। पहिला हामी केपी ओलीलाई संघीयता विरोधी भन्थ्यौं। उहाँ त भन्दै हुनुहुन्थ्यो की मैले संघीयता चाहेको होइन, जबरजस्ती लादिएको हो, म मजबुर थिए,’ उनले भने, ‘तर प्रचण्डलाई मैले अहिले कसरी हेरो भने प्रचण्ड संघीयता चाहने व्यक्ति पहिला तर अहिले संघीयताको घोर विरोधी प्रचण्ड हो। प्रचण्डले संघीयता चाहेकै छैनन्,’ उनले भने, ‘यो संघीयता चाहेको भए केपी ओली र रवि लामिछानेलाई ल्याएर सरकार बनाउनु हुँदैन थियो।बताए। रवि लामिछाने त प्रदेशमा अहिले पनि चुनाव लडेनन्। त्यस्ता मान्छेसँग गठबन्धन बनाउने नेतृत्वले देशमा संघीयता चाहेको छ ?’

नेकपा एमालेसहितका राजनीतिक दलहरूले वर्तमान सरकार अल्पतमतमा रहेकोले दीर्घकालीन असर पर्ने खालका निर्णयहरू नगर्न/नगराउन ध्यानाकर्षण पत्र पेस गरेका थिए।

नेकपा एमालेका अध्यक्ष केपी शर्मा ओलीले पहिला नै संघीयता नचाहेको स्पष्ट पारेको उल्लेख गरे। राष्ट्रिय स्वतन्त्र पार्टीका सभापति रवि लामिछानेलाई सरकारमा ल्याउने नेतृत्व संघीयताको पक्षधर हुनै नसक्ने उनको जिकिर छ।

मुख्यमन्त्री यादवले संघीयतामाथि प्रहार गर्न मधेश प्रदेशमा पटकपटक विश्वासको मत फिर्ता लिने, कर्मचारीको सरुवा गर्ने लगायतका गतिविधि संघ सरकारले गरेको बताए।