बजेटले सुधार गर्ने छनक देखाएन : पूर्वअर्थमन्त्री महत

काठमाडौँ-  प्रमुख प्रतिपक्षी नेपाली कांग्रेसले आगामी आर्थिक वर्षको बजेट व्यापारीको प्रभावमा परेर आएको बताएका छन्। मंगलबार अर्थमन्त्री वर्षमान पुनले संसद्को संयुक्त बैठकमा बजेट प्रस्तुत गरेपछि कांग्रेस प्रवक्ता तथा पूर्वअर्थमन्त्री प्रकाशशरण महतले व्यापारीको सेटिङमा स्याउ, आलु र प्याजमा लएको भ्याट हटाइएको आरोप लगाए।

‘व्यापारीको सेटिङको प्रभावमा आलुप्याज र स्याउमाथिको भ्याट हटाउने काम भयो,’ उनले भने, ‘हामीले आन्तरिक उत्पादनमा होइन भन्सारमा कर लगाउने भनेको थियौँ । भन्सारमा भ्याट लगाउँदा बाहिरबाट आउने उत्पादन महँगो हुन्छ। स्वदेशी उत्पादन प्रतिस्पर्धी हुन्छ भनेर लगाइएको थियो। त्यो हटाएपछि आन्तरिक उत्पादनले कसरी प्रतिस्पर्धा गर्छ।’

‘तर पनि यो वास्तविकताभन्दा माथि छ। उहाँहरूले सुधारको प्रारम्भ गर्छौँ भन्नु भएको छ। बजेटरी प्रक्रियामा सुधारका केही पनि कुरा उल्लेख छैनन्। सबैभन्दा ठुलो बजेटमा जे बेथिति थियो। त्यसलाई हामीले कार्यविधि बनाएर ३ करोडभन्दा तलको आयोजना नराख्ने भनेका थियौँ । त्यसमा उहाँ मौन हुनुहुन्छ,’ महतले भने।

उनले बजेटरी सुधार हुने कुनै छनक नदेखिएको बताए। बजेटका वितरणमुखी विषयवस्तु छोपिएको र कृषि क्षेत्रमा उत्पादनमा आधारित अनुदान दिने कुरा नराखिएको उनको भनाइ छ।

बजेटमा ६ प्रतिशत आर्थिक वृद्धिको लक्ष्य लिइएको कुनै हालतमा पुरा नहुने बताए।