महिलाले राष्ट्रको नेतृत्व लिन अग्रसर हुनुपर्छ : पूर्वराष्ट्रपति भण्डारी

काठमाडौँ- पूर्व राष्ट्रपति विद्यादेवी भण्डारीले समग्र राष्ट्रिय मुद्दामा राष्ट्रको नेतृत्व लिन महिला अग्रसर हुनुपर्ने बताएकी छन्। आज (बुधबार) नेकपा (एमाले) को राष्ट्रिय महिला भेलालाई सम्बोधन गर्दै उनले मुलुकलाई आर्थिक विकास र आर्थिक समृद्धि तर्फ अगाडि बढाउने दायित्व महिलाहरुले लिन अग्रसर हुनुपर्ने बताएकी हुन्।

‘महिलाले समग्र राष्ट्रिय मुद्दामा राष्ट्रको नेतृत्व लिन अग्रसर हुनुपर्छ।’ उनले भनिन्, ‘आर्थिक समृद्धि र विकास हासिल गर्नतर्फ मुलुक अगाडि बढाउने दायित्व हाम्रो दायित्व हाम्रो काँधमा छ।’

पूर्व राष्ट्रपति भण्डारीले हिंसाको मूल कारण पुरुष नभई हिंसामा आधारित सामाजिक व्यवस्था रहेको उल्लेख गरिन्। उनले राज्यका सबै निकायमा ३३ प्रतिशत महिला सहभागिताको विषय ऐतिहासिक रहेको बताईन्। उनले उक्त उपलब्धी कार्यान्वयनमा अझै चूनौति कायमै रहेको बताईन्। उनले महिलालाई आधा आकाश नभएर पूरै आकाशको रुपमा चित्रण गरिन्।

एमालेमा रहेर लामो समय सक्रिय राजनीतिमा सहभागी भएकी पूर्वराष्ट्रपति भण्डारी प्रमुख अतिथि बनेर एमालेको महिला राष्ट्रिय भेलामा सहभागी भईन्। उनी प्रमुख अतिथि भएर उक्त कार्यक्रममा सहभागी हुनु र महिलाले नेतृत्व लिनुपर्ने अभिव्यक्ति दिनुलाई धेरैले पुनः राजनीतिमा फर्किने संकेतको रुपमा लिएका छन्।