ओली र प्रचण्डले नेपाललाई सोधे- देउवा निवास जानुको कारण के?

काठमाडौँ- प्रधानमन्त्री पुष्पकमल दाहाल, नेकपा एमालेका अध्यक्ष केपी शर्मा ओली र नेकपा (एकीकृत समाजवादी) का अध्यक्ष माधवकुमार नेपालबीच भेटवार्ता भएको छ।

सिंहदरबारस्थित प्रधानमन्त्री तथा मन्त्रिपरिषद्को कार्यालयमा तीन नेताबीच भेट भएको हो। भेटका क्रममा समसामयिक राजनीतिका विषयमा छलफल भएको अध्यक्ष ओलीले बताएका छन्।

सत्तारुढ नेकपा (एकीकृत समाजवादी) का अध्यक्ष माधवकुमार नेपाल प्रमुख प्रतिपक्षी दल नेपाली कांग्रेसका सभापति शेरबहादुर देउवाले बोलाएको बैठकमा सहभागी भएपछि ओली र प्रचण्डले नेपाललाई सिंहदरबारमा बोलाएका हुन्।

बुधबार बुढानीलकण्ठस्थित देउवानिवासमा जसपा नेपालका अध्यक्ष उपेन्द्र यादव र लोसपा अध्यक्ष महन्थ ठाकुर पनि सहभागी भएको बैठकमा नेपाल पनि पुगेका थिए। उनले पार्टीका नेता मेटमणि चौधरीलाई पनि साथमै लिएर गएका थिए।

नेपाल देउवा निवास पुगेपछि एमाले र माओवादी केन्द्रमा तरंग भित्रिएको छ। प्रधानमन्त्री समेत रहेका प्रचण्डले त आफूसँगको परामर्शमा नै नेपाल देउवा निवास पुगेको जिकिर गरेका छन्। यद्यपि नेपाल प्रचण्डको सल्लाहमा देउवा निवास पुगेका भने होइनन्।

नेपाल देउवा निवास गएको विषयलाई नेकपा एमालेले गम्भीरताका साथ लिएको बताएको छ। छलफलपछि बाहिरिने क्रममा अध्यक्ष ओलीले संक्षिप्त प्रतिक्रिया दिँदै भने, ‘समसामयिक परिस्थितिको बारेमा छलफल भएको हो।’

सिंहदरबारमा भएको तीन नेताबीचको भेटलाई अर्थपूर्ण रुपमा हेरिएको छ।

प्रधानमन्त्री निवास स्रोतका अनुसार ओली र प्रचण्डले देउवा निवास जानुको अन्तर्यका विषयमा नेता नेपालसँग जिज्ञासा राखेका थिए। जवाफमा नेपालले कुनै भेटघाटले सत्ता समीकरणमा फरक नपार्ने बताएको प्रधानमन्त्री निकट स्रोतको दाबी छ।

देउवा निवासको छलफलमा मधेश प्रदेशमा जसपा नेपालको सरकार टिकाउनका लागि भेटमा सहभागी सबै दलका नेतासँग जसपा नेपालका अध्यक्ष उपेन्द्र यादवले सहयोग माग गरेका थिए। तर नेपालले भने कुनै प्रष्ट जवाफ नदिएपनि पार्टीमा सल्लाह गरी निष्कर्षमा पुग्ने र फेरि पनि छलफल गर्न सकिने बताएका थिए।

नेता नेपालको ग्रिन सिग्नल पाएपछि उता मधेश सरकारका मुख्यमन्त्रीसमेत रहेका जसपा नेपालका नेता सरोजकुमार यादवले जेठ २३ गते विश्वासको मत लिने तयारी गरेपछि गठबन्धन ढल्न सक्ने भन्दै एमालेको मनमा चिसो पसेको छ।

माओवादी भने एमालेसँगको गठबन्धन भत्किएपनि फेरि पनि कांग्रेस र नेकपा एससँग गठबन्धन बनाएर अघि बढ्नुपर्ने पक्षमा छ। यद्यपि वर्तमान सरकार अप्ठेरोमा नपरुन्जेल एमालेसँगकै गठबन्धनमा रहनुपर्ने मत माओवादीमा छ।

नेता नेपाल भने आफू प्रधानमन्त्री बन्ने मौका मिले गठबन्धन भत्काउन पनि अघि सर्ने मनस्थितिमा छन्। यसको संकेत नेकपा एसका प्रमुख सचेतक मेटमणि चौधरीले गरेका पनि छन्। उनले अब नेता नेपाल प्रधानमन्त्री बन्ने दिन धेरै टाढा नरहेको जिकिर गरेका छन्। चौधरीको अभिव्यक्ति आएपछि सत्ताधारी दलमा तरंग छ।