नेपालीभन्दा अङ्ग्रेजी भाषाका किन्ने बढी

नारायणगढ- जिल्लाका विद्यालयमा यस शैक्षिकसत्रमा अङ्ग्रेजी अनुवादका पुस्तक बढी खपत भएका छन्।

जनकशिक्षा सामग्री केन्द्रबाट प्रकाशित विशेषगरी गणित, विज्ञान र स्वास्थ्यका नेपाली भाषाका किताबभन्दा अङ्ग्रेजीमा अनुवाद गरिएका किताब बढी खपत भएका हुन्।

जनक शिक्षा सामग्री केन्द्र बागमती प्रादेशिक कार्यालय भरतपुरका कार्यालय प्रमुख धनबहादुर केसीका अनुसार कक्षा ६ देखि १० सम्मका अनुवादित पुस्तक बढीमात्रामा बिक्री भएका छन्।

उनले भने, ‘चितवनमा कक्षा १० मा अझ बढी अङ्ग्रेजी अनुवादका किताब बिक्री भएका छन्।’

उनले अन्तको अनुपातमा भरतपुर महानगरपालिका र कालिका नगरपालिकाका सामुदायिक विद्यालयले बढीमात्रामा अङ्ग्रेजी अनुवादका पुस्तक लगेको जानकारी दिए।

‘अघिल्ला वर्षमा खासै अनुवादित किताब गएका थिएनन्, अहिले अनुवाद गरिएका किताब बढी गए, चितवन पछि नवलपुर, तनहुँलगायतका जिल्लामा पनि अनुवादित किताब गत वर्षभन्दा बढी बिक्री गरिएको छ,’ उनले भने।

अनुवादित किताबको माग भएसँगै नेपालीमा छापिएका किताब मौज्दात रहेको उनको भनाइ छ।

‘सामुदायिक विद्यालयको स्तरवृद्धि र गुणस्तरीय शिक्षामा ध्यान दिन थालेसँगै अनुवादित किताब बढीमात्रामा गएका हुन्, सामुदायिक विद्यालयले पनि निजी विद्यालयसरहका पाठ्यपुस्तक र शिक्षामा गुणस्तर बढाएको पाइन्छ,’ केसीले भने।

उनका अनुसार चालु आर्थिक वर्षमा ती विषयका एक लाख आठ हजार दुई सय १० थान अनुवादित किताब बिक्री भएका छन्।

यस शैक्षिकसत्रमा १३ लाख १२ हजार ९८ थान किताब बिक्री भएको जनाउँदै उनले रु १७ करोड ९५ लाख ८५ हजार नौ सय १० का किताब बिक्री भएको बताए।

यस वर्ष किताबको अभाव नभएको जनाउँदै उनले भने, ‘अझै हामीसँग छ लाख नौ हजार पाँच सय ९० थान किताब बिक्रीका लागि राखिएको छ।’

केन्द्रले कापीसमेत छापेर बिक्री वितरण गर्ने गरेको छ। केन्द्रबाट चितवनसहित बारा, पर्सा, रौतहट, मकवानपुर, नवलपरासी (बर्दघाट–सुस्तापूर्व), तनहुँलगायत जिल्लामा किताब पुग्ने गरेका छन्।

अहिले अङ्ग्रेजी अनुवाद गरिएका किताब चितवनमा बढी गएको प्रमुख केसीले बताए।