महाकाली करिडोरको ट्र्याक खुलाउने कामले अब गति पाउँछ : रमेश लेखक

महेन्द्रनगर- नेपाली कांग्रेसका प्रमुख सचेतक रमेश लेखकले महाकाली करिडोरको ट्रयाक खुलाउने कार्यले गति पाउने बताएका छन्। कञ्चनपुर निर्वाचन क्षेत्र नं. ३ बाट निर्वाचित कांग्रेस नेता लेखकले विगतमा सरकारको उदासिनताका कारण निर्माणमा ढिलाई भएको बताउँदै अब डेढ वर्षभित्र करिडोरको ट्रयाक खुलिसक्ने दाबी गरे।

करिडोरको शून्य बिन्दु कञ्चनपुरको ब्रह्मदेव क्षेत्रको खल्ला मसेट्टीमा आइतबार स्थलगत अनुगमन गर्ने क्रममा उनले रुख कटानका लागि अनुमति लिन ढिलाई हादा योजनाको काम प्रभावित रहेको उनको भनाइ छ।

‘अहिलेको सरकारले कञ्चनपुरदेखि दार्चुलासम्ममै करिडोरको ट्रयाक खुलाउन रुख कटान लगगायत अरु कामको अनुमति दिइसकेको छ,’ नेता लेखकले भने, ‘अब कञ्चनपुरबाट आउँदो दशैमा डडेल्धुराको जोगबुढा क्षेत्रमा यही ट्रयाकबाट पुग्ने छौं।’

करिडोरको शुन्य बिन्दुदेखि १५ किलोमिटर ट्रयाक खुलाउने काम ठेक्का सम्झौता भएको डेढ वर्ष बितिसक्दा पनि रुख कटानको अनुमति नहुँदा अलपत्र छ। करिडोरको ट्रयाक खुले लगत्तै सडक कालोपत्रे गर्ने चरणमा जाने नेता लेखकको भनाइ छ। बैतडी, दार्चुलालगायतका जिल्लामा पनि करिडोरको निर्माणको अल्झन हटिसकेको बताउँदै आयोजनाका लागि बजेटको कमी नहुने उनको जिकिर छ।

नेपाल–भारत र चीनसित जोड्ने र त्रिदेशीय नाकाका रुपमा विकास गर्ने अवधारणाका साथ अघि बढेको करिडोरको ६० प्रतिशत ट्रयाक खुलेको छ। करिडोर अन्तर्गत ४२५ किलोमिटर ट्रयाकमध्ये केही भाग (दार्चुलामा) नेपाली सेनाले ट्रयाक खोलिरहेको छ।

करिडोरको अनुगमनमा प्रमुख सचेतक लेखकसँगै सुदूरपश्चिम प्रदेशसभाका सदस्य बेलबहादुर राना र मधु भारती, जिल्ला समन्वय समिति कञ्चनपुरका प्रमुख दुर्गादत्त बोहरा लगायतको सहभागी थिए।