राजनीति अपराधीकरण भएकाले भ्रष्टाचार मौलायो : नेता कोइराला

काठमाडौँ- नेपाली कांग्रेसका नेता डा. शेखर कोइरालाले राजनीतिभित्र अपराधीकरण भएका कारण भ्रष्टाचार मौलाएको बताएका छन्।

नेपाल मुस्लिम संघ मोरङको तेस्रो जिल्ला अधिवेशनलाई सम्बोधन गर्दै नेता कोइरालाले राजनीतिलाई अपराधीकरणका कारण देशमा भ्रष्टाचार बढेको र जनताले सुशासनको अनुभूति गर्न नपाएको बताएका हुन्।

पछिल्ला दिनहरुमा राजनीतिज्ञ, व्यवसायी र कर्मचारीहरु एक ठाउँमा उभिएको प्रसङ्ग उल्लेख गर्दै कोइरालाले भने, ‘जुन देशमा यी तीन समूह एक ठाउँमा उभिन्छन्, तब विद्यमान ऐन कानुनहरु गौण रहन्छ र देश बर्बादीको बाटोमा लाग्छ।’

कोइरालाले चारैतिरबाट देश संकटमा परेको बताए। उनले भने, ‘रेमिटेन्सले देश चलिरहेको छ। आर्थिक अवस्था राम्रो छैन। यस्तो अवस्थामा देश जतिबेला पनी कोल्याप्स गर्न सक्छ।’

मानिसको सबै अङ्गले काम गर्न छोडेपछि जति उपचार गरे पनि शरीर ठीक नहुने प्रसङ्ग उल्लेख गर्दै कोइरालाले अहिले देश त्यही अवस्थामा पुगेको बताए।

यो सरकार लामो समय नटिक्ने उनले चेतावनी दिए। कोइरालाले अहिले कांग्रेस आफ्नो पार्टी संगठनको काममा लाग्ने भन्दै आफूहरु सरकार ढाल्ने काममा लाग्ने पनि बताए।