ओपेक फन्डसँग अढाई करोड डलर ऋण लिँदै ग्लोबल आइएमई बैंक, साना व्यवसाय प्रवर्द्धनमा लगानी गर्ने योजना

काठमाडौँ- पेट्रोलियम पदार्थ निर्यातक राष्ट्रहरूको संगठन(ओपेक)को वित्तीय सेवा प्रदायक संस्था ओपेक फन्ड फर इन्टरनेसनल डेभलपमेन्ट (ओपेक फन्ड)ले ग्लोबल आइएमई बैंकलाई २५ मिलियन (२ करोड ५० लाख) डलर ऋण प्रदान गर्ने भएको छ।

यससम्बन्धी सम्झौतामा ओपेक फन्डका अध्यक्ष अब्दुल हमिद अल्खलिफा र ग्लोबल आइएमई बैंकका प्रमुख कार्यकारी अधिकृत रत्नराज बज्राचार्यले हस्ताक्षर गरेका हुन्।

ओपेक फन्डसँग लिइएको ऋण लघु, साना तथा मझौला उद्यमहरुलाई वित्तीय पहुँच बढाउन, जलवायु परिवर्तनका प्रभाव न्यूनीकरण गर्न र महिलाहरुद्वारा सञ्चालित व्यवसायहरुको क्षमता अभिवृद्धि गर्न परिचालन गरिने बैंकले जानकारी दिएको छ।

लघु, साना तथा मझौला उद्यमको संख्या नेपालमा दर्ता कुल व्यवसायको ९५ प्रतिशतभन्दा बढी रहेको छ। यसले ४५ प्रतिशतभन्दा धेरै रोजगारी सृजना गरेको छ। यसका बाबजुद, लघु, साना तथा मझौला उद्यमहरुले लगानीको ठूलो अभाव झेलिरहेका छन्। उक्त अभाव न्यूनीकरणका लागि ओपेकबाट ल्याइएको रकमले ठूलो सहयोग गर्ने बैंकको विश्वास छ।

‘नेपालमा लघु, साना तथा मझौला व्यवसायहरु र जलवायु परिवर्तनका असर न्यूनीकरणसम्बन्धी परियोजनाहरुलाई सुदृढ बनाउन ग्लोबल आइएमई बैंकसँग साझेदारी गर्न पाउँदा हामीलाई खुसी लागेको छ। यी क्षेत्रहरु दिगो आर्थिक वृद्धि र जलवायु परिर्वतनको प्रतिरोधात्मक क्षमताका लागि निकै महत्त्वपूर्ण छन्। हाम्रो यस ऋणले लगानीको अभाव सामना गरिरहेका विभिन्न क्षेत्रमा वित्तीय पहुँच बढाउँदै समावेशी विकासलाई प्रवद्र्धन गर्नेछ,’ अल्खलिफाले भने।

ऋण सम्झौताले दिगो विकास लक्ष्य हासिल गर्न र जलवायु तथा लैंगिक वित्तमार्फत त्यस क्षेत्रमा देखिएको स्रोतको अभावलाई परिपूर्ति गर्न महत्वपूर्ण सहयोग गर्ने ग्लोबल आइएमई बैंकका प्रमुख कार्यकारी अधिकृत रत्नराज बज्राचार्यले बताए। ‘नेपालमा हरित ऊर्जा क्षेत्रको स्रोत अभावलाई सम्बोधन गर्दै महिलाहरुलाई आर्थिकरुपमा सशक्त बनाउन पनि सहयोग गर्ने विश्वास लिएका छौँ,’ उनले भने।  सहकार्यको लागि ओपेक फन्डलाई उनले धन्यवाद ज्ञापन गरेका थिए।

ओपेक फन्ड र नेपालको दीर्घकालीन साझेदारी दिगो विकासमा केन्द्रित छ। ओपेक फन्डले बैंकिङ, ऊर्जा, कृषि, यातायात र शिक्षासहित विभिन्न क्षेत्रहरुमा वित्तीय सहयोगको प्रतिबद्धता गरेको छ।