प्रचण्डलाई एमालेको सन्देश : सरकार अल्पमत पर्‍यो, दीर्घकालीन निर्णय नगर्नू

काठमाडौँ- नेकपा (एमाले)ले पुष्पकमल दाहाल ‘प्रचण्ड’ नेतृत्वको संघीय सरकार अल्पमतमा परेको बताएको छ।

दाहाल नेतृत्वको सरकारलाई आफूहरूले दिएको समर्थन फिर्ता लिइसकेको र मन्त्रीहरूले पनि पदबाट राजीनामा दिइसकेको उल्लेख गर्दै महासचिव शंकर पोखरेलले सरकार अल्पमतमा परेको बताएका हुन्।

‘संसदका दुई ठूला दल नेकपा (एमाले) र नेपाली कांग्रेस नयाँ सरकार गठनका लागि सहमत भएको अहिलेको परिस्थितिमा वर्तमान प्रधानमन्त्री पुष्पकमल दाहाल ‘प्रचण्ड’ले विश्वासको मत पाउने अवस्था नरहेको हुँदा अल्पमतमा परेको सरकारबाट दीर्घकालीन असर पर्ने कुनै पनि काम नगर्न/नगराउन नेकपा (एमाले) प्रधानमन्त्रीको ध्यानाकर्षण गर्दछ,’ पोखरेलले जारी गरेको विज्ञप्तिमा उल्लेख छ।

एमालेका ८ जना मन्त्रीहरूले बुधबार राजीनामा दिएका थिए। एमालेले बुधबार नै सरकारलाई दिएको समर्थन फिर्ता लिएको थियो।

एमालेका ८ जना मन्त्रीहरूको राजीनामा बिहीबार स्वीकृत भइसकेको छ। ती मन्त्रालय प्रधानमन्त्री दाहालले नै हेर्ने गरी राष्ट्रपति रामचन्द्र पौडेलले जिम्मेवारी तोकिसकेका छन्।

एमाले र कांग्रेसबीच एमाले अध्यक्ष केपी शर्मा ओलीको नेतृत्वमा राष्ट्रिय सहमतिको सरकार गठन गर्ने सहमति बनेको छ। असार १७ गते उक्त सहमति भएको हो।

एमालेले राष्ट्रिय सहमतिको सरकार गठनको प्रक्रियामा सहभागी हुन र सहयोग गर्न पनि दलहरूलाई आग्रह गरेको छ।

प्रधानमन्त्री दाहालले भने संसदबाट विश्वास मत लिने तयारी गरिरहेका छन्। कुनै दलले समर्थन फिर्ता लिएमा संविधानअनुसार एक महिनाभित्र प्रधानमन्त्रीले विश्वास मत लिनुपर्ने हुन्छ।