कांग्रेस र नेकपा मिल्दा प्रतिगमन हुन सक्ने डर छ : प्रचण्ड

काठमाडौँ- प्रधानमन्त्री पुष्पकमल दाहाल ‘प्रचण्ड’ ले नेपाली कांग्रेस र नेकपा (एमाले) मिल्दा प्रतिगमन हुन सक्ने डर लागेको बताएका छन्।

प्रतिनिधिसभामा शुक्रबार विश्वासको मतसम्बन्धी प्रस्ताव पेस गर्दै प्रधानमन्त्री दाहालले यस्तो बताएका हुन्। संसदको पहिलो र दोस्रो ठूलो दललाई विश्वासले नजोडेको दाबी गर्दै उनले दलाल र ठगहरूले दुई दल मिलाएको आरोप पनि लगाए।

‘नियत सफा भए पहिलो र दोस्रो ठूला दल मिल्न अँध्यारो बन्द चाहिन्छ?’ गत असार १७ गते रातको समयमा कांग्रेस र एमालेको सहमतिप्रति लक्षित गर्दै उनले भने, ‘सदनबाट मैले विश्वासको मत पाउँला नपाउँला, म प्रधानमन्त्री रहुँला नरहुँला, त्यसमा म बिल्कुल चिन्तित छैन। म चिन्तित पछिल्ला नाटकीय घटनाक्रमबाट छु। संसदको पहिलो र दोश्रो ठूलो दललाई विश्वासले जोडेको भए चिन्ताको विषय हुने थिएन, डरले जोड्यो। त्यो डर हो, सुशासनको डर।’

लामो संघर्ष र ठूलो बलिदानबाट जनताले प्राप्त गरेका अधिकार कांग्रेस र एमालेले खोस्न लागेकोसमेत उनको आरोप थियो। झूटमुट र कुतर्कको सहारा र मध्यरातमा सहमति गर्नुको अर्थ प्रतिगमन नै हुने उनको भनाइ छ।

‘तपाईहरूको यात्रा प्रतिगमनतिर हो भन्ने कुरा सहमतिको तरिका, सहमति गरेको ठाउँ र सहमतिको समयबाट आम जनताले बोध गरिसकेका छन्। तपाईहरू यति धेरै अपारदर्शी हुनुहुन्छ कि जनताको त कुरै छोडौं आफ्नै पार्टी पंक्तिलाई समेत अन्धकारमा राखिरहनुभएको छ। नियत सफा भए पहिलो र दोश्रो दल मिल्न अँध्यारो बन्द कोठा चाहिन्छ? झूटमुट र कुतर्कको सहारा र मध्यरात चाहिन्छ?’ उनले भने।