प्रधानमन्त्री ओली भन्छन्- ३७ हजार पनि इन्जिनियरको कुनै तनखा हो र!

काठमाडौँ– प्रधानमन्त्री केपी शर्मा ओलीले इन्जिनियरको न्यूनतम तलबका विषयमा आश्चर्य प्रकट गरेका छन्।

६२औं इन्जिनियर्स दिवसको अवसरमा बिहीबार काठमाडौँमा आयोजित कार्यक्रममा उनले यस्तो इन्जिनियरको तलवका विषयमा आश्चर्य व्यक्त गरेका हुन्।

कार्यक्रममा इन्जिनियरहरुले आफ्नो समस्या सुनाएका थिए।

‘तपाईंहरूको एउटा माग मार्मिक लाग्यो मलाई। ३७ हजार बेसिक तलब तोकिएको छ। त्यसलाई पनि कानुनी रुप दिइपाउँ भन्दै हुनुहुन्छ। ३७ हजार पनि इन्जिनियरको कुनै तनखा हो र? यो त अचम्मको कुरा भयो नि!,’ ओलीले थपे, ‘सरकार र हामी हरेकका लागि यो व्यंग्य जस्तो छ।’

३७ हजार तलबले दैनिकी चलाउनै गाह्रो हुने अवस्थामा पनि नैतिकतामा रहेर काम गर्न आह्वान गरेको भन्दै इन्जिनियरको प्रशंसा गरे।

‘घरभाडा ३० हजार तल पाउनुहुन्न, बजार महिना चलाउन एउटा परिवारलाई कमसेकम ३० हजार बिना हुँदैन होला। अनि तलब ३७ हजार!’ ओलीले थपे, ‘सरकार तपाईंहरूका मागप्रति पोजेटिभ छ।’

इन्जिनियरहरुको यो माग आफूहरुका लागि व्यंग्य भएको ओलीले बताए। उनले यसो भन्दा हलमा सहभागीले ताली बजाएका थिए।