साढे १४ खर्ब रेमिट्यान्स भित्रियो

काठमाडौँ- गत आर्थिक वर्ष २०८०/८१ मा रु १४ खर्ब ४५ अर्ब ३२ करोड बराबरको विप्रेषण (रेमिट्यान्स) मुलुकमा भित्रिएको छ।

नेपाल राष्ट्र बैंकले आइतबार सार्वजनिक गरेको विवरण अनुसार विप्रेषण आप्रवाहमा १६.५ प्रतिशतले वृद्धि भएको हो।

अमेरिकी डलरमा विप्रेषण आप्रवाह १४.५ प्रतिशतले वृद्धि भई १० अर्ब ८६ करोड डलर पुगेको छ। आव २०७९/८० मा यस्तो आप्रवाह १३.९ प्रतिशतले बढेको थियो।

समीक्षा अवधिमा वैदेशिक रोजगारीका लागि अन्तिम श्रम स्वीकृति (संस्थागत तथा व्यक्तिगत–नयाँ) लिने नेपालीको सङ्ख्या ४ लाख ६० हजार १०३ र पुनःश्रम स्वीकृति लिनेको सङ्ख्या २ लाख ८१ हजार १९९ रहेको छ।

अघिल्लो वर्षको सोही अवधिमा नयाँ श्रम स्वीकृति लिनेको सङ्ख्या क्रमशः ४ लाख ९७ हजार ७०४ र पुन: श्रम स्वीकृति लिनेको संख्या २ लाख ७७ हजार २७२ रहेको थियो।

समीक्षा वर्षमा खुद ट्रान्सफर १४.७ प्रतिशतले वृद्धि भई रु १५ खर्ब ७१ अर्ब २४ करोड पुगेको छ। अघिल्लो वर्ष यस्तो ट्रान्सफर २२.५ प्रतिशतले बढेको थियो।