राम्रो टिम बनेपछि अर्कै भूमिकामा जाने सोचिरहेको छु : प्रचण्ड

सुर्खेत- नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले नेतृत्व हस्तान्तरणका लागि टिम राम्रो नबनेको टिप्पणी गरेका छन्। पार्टीको कर्णाली प्रदेश परामर्श बैठकलाई सम्बोधन गर्न सुर्खेत आएका प्रचण्डले विमानस्थलमा पत्रकारहरुसँग कुरा गर्दै यस्तो बताएका हुन्।

उनले आफूलाई माओवादीको अध्यक्षको पद त्यति ठूलो नलाग्ने पनि बताए। ‘म झण्डै ७० वर्ष कट्दै छु, सधैँ नेतृत्व गरिरहने रुचि छैन्,’ उनले भने, ‘अब त मलाई अध्यक्ष भन्ने पद त्यति ठुलो लाग्दैन। देश दुनियाँमा अध्यक्ष भन्दा प्रचण्ड माथि भइसक्यो। एउटा राम्रो टिम बनेपछि म अर्का भूमिकामा जाने सोचिरहेको छु।’

भ्रष्टाचार र बेथितिलाई जोगाउँदै सरकारले भ्रष्टाचारीको संरक्षण गर्ने काम जारी राखे सदन र सडकबाट प्रतिवाद गरिने बताएका थिए।

कांग्रेस र एमालेको सरकार कसको चाहनामा र कसरी सरकार निर्माण भयो भन्ने हरेक घटनाक्रम आफूलाई जति कसैलाई पनि थाहा नभएको बताए। वर्तमान सरकारले आफू नेतृत्वको सरकारले अघि बढाएको भ्रष्टाचारमाथिको छानबिनलाई सामसुस पार्ने खेल रचिरहेकाले यसविरुद्ध सदन र सडकबाट आवाज घनीभूत गराउने पनि चेतावनी दिए।

भदौ ११ मा आफूले संसदमा गरेको सम्बोधनले उत्तेजना र आवेग नभई सरकारका गलत कामको भण्डाफोर गरेको उनको जिकिर छ।

‘एमालेका साथीहरुले त्यसरी नबोलेको भए हुन्थ्यो, कुनै समयमा जनयुद्ध र यसका उपलब्धिलाई उहाँहरुले राम्रोसँग ब्याख्या गर्नुभएकै हो । अझ जसले हिंसा भन्ने शब्द प्रयोग गर्नुभयो, उहाँले जनयुद्धको प्रशंसा नै गर्नुहुन्थ्यो,’ अहिले सदनमा चलिरहेको ‘हिंसा’ सम्बन्धी विवादका सम्बन्धमा पत्रकारले सोधेको प्रश्नमा अध्यक्ष प्रचण्डले भने, ‘विस्तृत शान्ति सम्झौतादेखि संविधानमा उल्लेख गरिएका शब्दको मर्मभन्दा बाहिर जाने गरी त्यस्ता अभिव्यक्ति नदिन म सम्बन्धित साथीहरुलाई सचेत गराउन चाहन्छु।’

माओवादी फुटछ भन्ने हल्ला निराधार भएको र पछिल्ला बैठकहरुमा भइरहेका खुला र स्पष्ट बहसले सबै आशंका अन्त्य गरेको प्रचण्डको जिकिर छ।