रास्वपाका सुदूरपश्चिम महामन्त्री पारस बाहुन पनि बर्खास्त

काठमाडौँ-  राष्ट्रिय स्वतन्त्र पार्टी (रास्वपा)का केन्द्रीय महामन्त्री मुकुल ढकाल बर्खास्त भएलगत्तै सोही पार्टीका सुदूरपश्चिम महामन्त्री पारस बाहुन पनि बर्खास्त भएका छन्।

रास्वपा सुदूरपश्चिम कार्यसमितिका सभापति प्रकाश विष्टले विज्ञप्तिमा जारी गर्दै बाहुनलाई बर्खास्त गरिएको जानकारी गराएका हुन्।

बाहुन बिहीबारदेखि बर्खास्तीमा परेका हुन्। पार्टी नेतृत्वलाई असफल बनाउन भूमिका खेलेको भन्दै पदमुक्त गरिएको सभापति विष्टले जानकारी दिए।

‘यहाँले पछिल्लो समयमा सङ्गठन र नेतृत्वलाई असहज : असफल बनाउने विविध क्रियाकलापहरू गर्नु भएको हुँदा सोबारे स्पष्टीकरण सोधिएकोमा उक्त स्पष्टीकरण पत्रको जवाफ सन्तोषजनक नभएको हुँदा राष्ट्रिय स्वतन्त्र पार्टीको विधान २०७९ को धारा ३० को उपधारा १ को (ग) र दोस्रो संशोधन विधानको भाग ७ धारा २८ उपधारा १ को (ट) बमोजिम यहाँलाई आजको मिति २०८१(०५( १३ गते बिहीबारका दिनदेखि प्रदेश महामन्त्री पदको जिम्मेवारीबाट मुक्त गरिएको ब्यहोरा जानकारी गराउँदछु‚’ विज्ञप्तिमा लेखिएको छ।

कारबाही गर्नुअघि प्रदेश समितिले २१ बुँदे कारण देखाउँदै ७२ घण्टे स्पष्टीकरण सोधेको थियो। बाहुनले पनि भदौ ११ गते नै २१ बुँदे जवाफ फर्काएका थिए।

यसअघि राष्ट्रिय स्वतन्त्र पार्टी (रास्वपा)ले केन्द्रीय महामन्त्री डा. मुकुल ढकाललाई पनि पदबाट बर्खास्त गरेको थियो। असार २५ गते पार्टी केन्द्रीय कार्यालय बालाजुमा बसेको केन्द्रीय समितिको बैठकले महामन्त्री ढकाललाई महामन्त्री, केन्द्रीय सदस्य र पार्टी प्रवक्ताको जिम्मेवारीबाट बर्खास्त गर्ने निर्णय थियो।

भदौ ११ ढकाललाई राष्ट्रिय स्वतन्त्र पार्टी (रास्वपा)को साधारण सदस्यसमेत नरहने गरी बर्खास्त गिरिएको छ। साधारण सदस्यबाट हटाउनुअघि रास्वपा केन्द्रीय अनुशासन आयोगले ढकाललाई पार्टी विधानअनुसार स्पष्टीकरण सोधेको थियो। उनले रास्वपा सभापतिले भ्रष्टाचार गरेको आरोप लगाउँदै पत्र पठाएका थिए। उक्त पत्र सामाजिक सञ्जालबाट पनि सार्वजनिक गरेका थिए।