मेरो ‘रिटायरमेन्ट’को बेला भइसक्यो, भोलि हुने नेताले चिन्तन गर्नुपर्छ : देउवा

काठमाडौँ-  नेपाली कांग्रेसका सभापति शेरबहादुर देउवाले कांग्रेस र एमाले मिल्दा देशमा खुसीयाली आएको बताएका छन्।

बिहीबार पार्टीबाट विजयी स्थानीय तहका प्रमुखहरूलाई सम्मान कार्यक्रमलाई सम्बोधन गर्दै देउवाले सुरुमा पार्टीका सबै साथीहरु चिन्तित भएपनि अहिले आएर पार्टीका नेता मात्र नभइ देशमा नै खुसी ल्याएको बताएका हुन्।

उनले भने, ‘हिजो एमाले र माओवादी मिल्दा पार्टीका सबै साथीहरु चिन्तित थिए, डराइरहेका थिए।साथीहरुको भावनाअनुसार मैंले एमालेका नेता केपी ओलीसँग कुरा गरेर सहमतिमा पुग्यौं। सहमतिले उहाँ प्रधानमन्त्री हुनुहुन्छ। दुई वर्षपछि उहाँले प्रधानमन्त्री छोड्ने सहमति भएको छ। साथसाथै दुईवटा पार्टीको बीचमा जुन सहमति भएको छ त्यसले मलाई विश्वास छ ओलीजीको पनि त्यस्तो अरु पार्टी सिध्याउने कुरा गर्नुभएको छैन। सबैलाई मिलाएर लैजान चाहन्छौं। हामीबीच भएको सहमतिले देशभर खुशी ल्याएको छ।’

साथै उनले पार्टी छोडेर गएकाहरु पुन पार्टीमा फर्किन थालेको बताए। उनले पार्टीलाई कमजोर बनाउने षडयन्त्र भइरहेको बताउँदै सचेत रहन पार्टी पदाधिकारीहरुलाई अग्रह गरे। उनले दुई पार्टी मिलेपछि अरु पार्टीलाई सिध्याउने नीति कांग्रेसको नभएको बताए।

देउवाले हरेक कारणले आफ्नो रिटायरमेन्टको बेला भइसकेको बताए। सभापति देउवाले एमाले र कांग्रेसबीच सहमति हुँदा अरु पार्टीमा गएकाहरु पनि आफ्नो पार्टीमा फर्किंदै गरेको दाबी गरे।

‘हाम्रोबाट अरु पार्टीमा गएकाहरु पनि फर्किंदै छन्। अझै फर्काउने काममा लाग्नुपर्छ,’ उनले भने, ‘हाम्रो पार्टी कमजोर बनाउनेहरु अझै छन्। हामीले सबैलाई एक गरेर बलियो पार्टी बनाउनु पर्छ। मेरो एज पनि गयो। हरेक कारणले पनि रिटायरमेन्टको बेला भइसकेको छ। भोलि हुने नेताहरुले नै चिन्ता बढी गर्नुपर्छ। मलाई भन्दा बढ्ता चिन्ता गर्नुपर्छ।’

सभापति देउवाले अरु राजनीतिक दललाई कमजोर बनाउने नीतिअनुसार वर्तमान सरकार निर्माण नभएको पनि प्रष्ट पारे।