संसदको रेकर्डबाट ‘हिंसा’ शब्द नहटाएसम्म अवरोध कायमै राख्ने माओवादीको निर्णय

काठमाडौँ- नेकपा माओवादी केन्द्रले संसदको रेकर्डबाट ‘हिंसा’ शब्द नहटाएसम्म अवरोध कायमै राख्ने निर्णय गरेको छ।

शुक्रबार संसदीय दलको कार्यालय सिंहदरबारमा बसेको दलको बैठकले यस्तो निर्णय प्रमुख सचेतक हितराज पाण्डेले जानकारी दिए।

जनयुद्धलाई अपमानित गर्ने गरी एमालेका सांसदले संसदमा ‘हिंसा’ भनेको भन्दै माओवादीले आपत्ति जनाएको हो।

‘माओवादी जनयुद्धलाई एमालेले अपमानित गरेको छ। त्यो शान्ति सम्झौता र संविधानविपरित छ। संसद्‌मा तपाईँहरूले जसरी प्रतिवाद गर्न भएको ठिक छ,’ उनले भने, ‘हिंसासँग मात्र होइन समग्र माओवादी आन्दोलन, जनमुक्ति सेनालाई बदनाम गर्ने ढङ्गले आएको छ। आगामी दिनमा त्यसको सशक्त प्रतिवाद गर्ने गरी समाधान नभएसम्म संसद् अवरोध जारी राख्ने निर्णय गरेको छ।’

सभामुखले भदौ २६ गते गरेको रुलिङ चित्तबुझ्दो नभएको भन्दै माओवादीले असन्तुष्टि जनाएको छ।

भदौ १२ गते एमालेका सांसद योगेश भट्टराईले माओवादीको सशस्त्र संघर्षलाई ‘माओवादी हिंसा’ भनेका थिए। यसपछि माओवादी सांसदले त्यसको विरोध गरेका थिए।

संसद्को रेकर्डबाट हिंसा शब्द हटाउन सभामुख देवराज घिमिरेको ध्यानाकर्षण गराएका थिए। तर घिमिरेले हिंसा शब्द असंसदीय नभएको बैठकलाई जानकारी गराएका थिए।

सभामुख घिमिरेको रुलिङप्रति असहमति जनाउँदै माओवादीले बैठक अवरोध गरेको थियो।