महासंघ पदाधिकारीले भेटे श्रममन्त्री

काठमाडौं– उद्योग वाणिज्य महासंघ अध्यक्ष चन्द्रप्रसाद ढकाल नेतृत्वको प्रतिनिधिमण्डलले श्रम, रोजगार तथा सामाजिक सुरक्षामन्त्री शरतसिंह भण्डारीसँग भेटवार्ता गरेको छ।

भेटमा महासंघ अध्यक्ष ढकालले मुलुकको अर्थतन्त्र मन्दीतर्फ गएको संकेत तथ्यांकले पुष्टि गरिसकेकाले यो अवस्थामा उद्योग व्यवसाय सञ्चालन, रोजगारीमा पर्न सक्ने प्रभावको न्यूनीकरण र सम्भावित समस्या सामना गर्न सरकार एवं निजी क्षेत्रको बलियो सहकार्यमा जोड दिए।

अध्यक्ष ढकालले श्रम बजारमा मागअनुसारको सीप विकासमा जोड दिनुपर्ने आवश्यकता औंल्याए। वैदेशिक रोजगारीमा जाँदा लिइने केही अव्यावहारिक नीति नियमको पुनरावलोकन हुनुुपर्नेमा अध्यक्ष ढकालले मन्त्री भण्डारीको ध्यानाकर्षण गराए।

भेटमा मन्त्री भण्डारीले महासंघबाट राखिएका सुुझाव सम्बन्धमा मन्त्रालयका तर्फबाट गर्नुपर्ने नेतृत्वदायी भूमिकामा रहेर सहयोग गर्ने प्रतिबद्धता जनाए । मन्त्री भण्डारीले वैदेशिक रोजगारसँग सम्बन्धित नीति नियमलाई व्यावहारिक बनाउन आफू तयार रहेको र सीप विकासलगायतका श्रम क्षेत्रका सवै विषयमा निजी क्षेत्रसँग छलफल गरी काम गर्ने विश्वास दिलाए।

प्रतिनिधिमण्डलमा महासंघका वरिष्ठ उपाध्यक्ष अञ्जन श्रेष्ठ, उपाध्यक्ष सुरकृष्ण वैद्य, हेमराज ढकाल, ज्योत्सना श्रेष्ठ र महानिर्देशकको सहभागिता थियो ।

अध्यक्ष ढकाल–आईएलओ देशीय निर्देशकबीच भेट

आजै महासंघ सचिवालयमा अध्यक्ष ढकाल र अन्तर्राष्ट्रिय श्रम संगठनका नेपालका लागि देशीय निर्देशक नुमान ओजकानबीच भेटवार्ता भएको छ।

भेट अवसरमा महासंघ अध्यक्ष ढकालले विद्यमान आर्थिक अवस्था, श्रम सम्बन्ध र वर्तमान नेतृत्वले अगाडि सारेका मुख्य प्राथमिकताका विषयबारे जानकारी गराउंदै आइएलओबाट प्राप्त सहयोगका लागि धन्यवाद दिए।

अध्यक्ष ढकालले आर्थिक संकट समाधानको रणनीति तयार गर्ने, लगानी वातावरण बनाउने, दक्ष जनशक्ति उत्पादन र रोजगारी सिर्जना गर्नेलगायत महासंघको प्राथमिकतालाई सफल पार्न दुवै संस्थाबीच सहकार्यमा जोड दिए।

आइएलओका देशीय निर्देशक नुमान ओजकानले सीप विकास, पेसागत स्वास्थ्य सुरक्षा, सामाजिक सुरक्षा र सामाजिक संवादको विषयमा चर्चा गर्दै समावेशी आर्थिक विकासमा जोड दिए।