‘घण्टी बजाओस् कि घाम तापोस्, कि छहारीमा बसोस्, सहकारी ठगीमा सबैमाथि अनुसन्धान हुनुपर्छ’ [भिडियो]

काठमाडौँ- सत्तारुढ प्रमुख घटक नेपाली कांग्रेसका महामन्त्री गगनकुमार थापाले सहकारी ठगीमा संलग्न कांग्रेसका धनराज गुरुङमाथि पनि अुनसन्धान गर्न आग्रह गरेका छन्। उनले एमालेका ऋषिकेश पोखरेललाई पनि अनुसन्धानको दायरामा ल्याउन सरकारसँग माग गरे।

दोषी देखिए उनीहरूमाथि पनि कारबाही चलाउनुपर्ने थापाको भनाइ छ। उनले सरकारले आम नागरिकको विश्वसनीयता जगाउन पनि ठगीमा संलग्न जो कोही पनि अनुसन्धान गरी कारबाहीको दायरामा ल्याउने काममा ढिलाई गर्न नहुने बताए।

सोमबार नेपाल राष्ट्र बैंकले काठमाडौँमा आयोजना गरेको दसैँतिहार, छठलगायतका पर्वको शुभकामना आदानप्रदान कार्यक्रममा बोल्दै महामन्त्री थापाले यस्तो बताएका हुन्। सरकारले न्यायको कठघरामा जो कोही पनि उभिनुपर्छ भन्ने मान्यता स्थापित गराउन पनि सहकारी ठगीमा संलग्न सबैलाई कारबाहीको दायरामा ल्याउन हिच्किच्याउने काम गर्न नहुने बताए।

‘सहकारीका अपचलन गर्ने सयौंको संख्यामा छन्। ती मान्छेमध्ये ५/६ सय मान्छे अभियोजनको क्रममा छन्। अरु ५/७ सय मान्छे फरार छन्। ती सबै मान्छेलाई अनुसन्धानको दायरामा ल्याउ। त्यो नयाँ होस् कि पुरानो होस कि। त्यो घाम तापेर बसेको होस कि घण्टी बजाएर बसेको होस् कि रुखको छायामुनि बसिराखेको होस् कि,’ उनले भने, ‘सबैलाई अनुसन्धानमा ल्याउ। छानबिन समितिमा बकाईदा त्यही भन्छ। त्यसैले हामी भनिरहेका छौं सरकारलाई–यी सबै विषयहरुका सन्दर्भमा जे काम अह्राएको छ, त्यो काम राम्रोसँग गर्नुस्। आम नागरिकहरुको विश्वसनीयताको कुरा पनि हो। अहिले बाहिर छलफल चर्चा चलेको छ–नेपाली कांग्रेसको एक जना नेता पार्टीको उपसभापति माननीय धनराज गुरुङको संलग्नता सन्दर्भमा समितिमा छलफल भयो, बहस भयो। थप अनुसन्धान गर्नुपर्छ। मत सरकारलाई यहीँबाट अनुरोध गर्न चाहन्छु– बकाईदा अनुसन्धान गर्नुस्। अनुसन्धान गर्नु पनि पर्छ। नेकपा एमालेका ऋषि पोखरेलजीको नाम आयो। गर्नुस् अनुसन्धान। अनुसन्धान गर्नुस् मात्रै होइन, यदि गल्ती गर्नुभएको छ भने अभियोजन पनि गर्नुस्। दण्ड पनि दिनुस्।’

महामन्त्री थापाले प्रधानमन्त्री, मन्त्रीहरुलाई धेरै नबोल्न पनि सुझाव दिए। सरकारमा बसेकाहरुले बोल्ने नभई उनीहरूले गरेका काम बोल्नुपर्ने महामन्त्री थापाको भनाई थियो। महामन्त्री थापाले सरकार बलियो भएकाले सन्देश दिनेगरी काम हुनुपर्ने बताए।