काठमाडौँमा रवि लामिछानेको बयान सकियो, फेरि पोखरा लैजाने तयारी

काठमाडौँ- राष्ट्रिय स्वतन्त्र पार्टी (रास्वपा)का सभापति तथा पूर्वगृहमन्त्री रवि लामिछानेसँगको बयान काठमाडौँमा सकिएको छ।

कालीमाटीस्थित स्वर्णलक्ष्मी बहुउद्देश्यीय सहकारी संस्थाको रकम अपचलनबारे अनुसन्धान गर्नका लागि काठमाडौँमा ल्याइएका रविको बयान काठमाडौँमा सकिएको हो।

तीन दिनसम्म बयान लिइएको काठमाडौँ प्रहरी परिसले जानकारी दिएको छ।

सोमबार साँझ उनको बयान पुरा भएको हो। मंसिर १४, १६ र १७ मा उनीसँग बयान लिइएको हो। काठमाडौँका सहन्यायाधिवक्ता सन्देश श्रेष्ठको कार्यकक्षमा उनको बयान लिइएको थियो।

अनुसन्धानमा संलग्न अधिकृतहरूका अनुसार लामिछानेलाई विभिन्न प्रश्नहरू गरेका थिए। स्वर्णलक्ष्मीबाट लिएको ऋण, फिर्ता रकम र फिर्ता हुन नसकेको रकमबारे उनलाई प्रश्न गरिएको थियो।

कार्तिक २ मा पक्राउ परेका लामिछाने र जीबी राईले स्वर्णलक्ष्मीबाट २०७८ भदौ ४ मा ‘फोर ह्विलर लोन’ र २०७८ कार्तिक १ मा ‘ईको सेभेन सिटर भ्यान’ खरिद गर्न भनेर ऋण निकालेका थिए।

‘फोर ह्विलर लोन’ बापत ४६ लाख ९८ हजार लिएको तर, ३२ लाख २१ हजार फिर्ता नगरेको स्वर्णलक्ष्मीको रेकर्डमा भेटिएको छ।

स्वार्णलक्ष्मीबाट १ अर्ब ११ करोड निक्षेप अपचलन भएको प्रहरीको प्रारम्भिक अनुसन्धान निष्कर्ष छ।

२७ हजार निक्षेपकर्ताले सो सहकारीमा २ अर्ब ६५ करोड ९५ लाख जम्मा गरेको सहकारीको रेकर्डमा भेटिएको छ।

काठमाडौँमा बयान सकिएपछि रविलाई फेरि पोखरा पठाउने तयारी गरिएको छ।

मंसिर ९ गते कास्की जिल्ला अदालतले रविलाई थुनामा राखेर अनुसन्धान गर्न प्रहरीलाई १५ दिनको समय दिएको छ। रविलाई मंसिर २३ गते फेरि पनि कास्की अदालत पुर्‍याउनुपर्ने छ।

सुरुमा रविमाथि सहकारी ठगी र संगठित अपराधमा अनुसन्धान थालिएको थियो। अब कास्की प्रहरीले सम्पत्ति शुद्धीकरणको कसुरमा अनुसन्धान थालेको थियो।

लामिछानेमाथि बुटवलको सुप्रिम सहकारी, चितवनको साहारा सहकारी लगायतमा भएको रकम हिनामिनामा पनि अनुसन्धान भइरहेको छ ।

प्रहरी अधिकृतहरुले यो बीचमा ऋण तिर्न भन्दै लामिछानेले काटेका चेकहरु समेत बरामद गरेको छ।

लामिछाने र उनकी पत्नीको खातामा भएको कम्तिमा ५० करोड रुपैयाँ बराबरको कारोबारबारे पनि जाँच गरिरहेको छ। रवि विरुद्ध चितवन जिल्ला अदालतले पनि पक्राउ पुर्जी जारी गरेको छ। रुपन्देहीमा पुगेर उनले बयान दिइसकेका छन्।