पोखरामा सिचुवान उडानले प्राविधिक समस्या नरहेको प्रमाणित गर्‍यो : प्राधिकरण

काठमाडौँ-  नेपाल नागरिक उड्डयन प्राधिकरणले पोखरामा सिचुवान एयरलाइन्सको उडानले प्राविधिक रूपमा कुनै समस्या नरहेको प्रमाणित गरेको बताएको छ।

बिहीबार बिहानै चीनबाट १२९ यात्रु लिएर सिचुवानको जहाज पोखरा विमानस्थलमा अवतरण गरेपछि प्राधिकरणले यस्तो प्रतिक्रिया दिएको हो।

उक्त जहाजले पोखरा-काठमाडौँमा प्रमोसनल उडान पनि गरेको थियो।

पोखराबाट दिउँसो १२ बजे १२६ यात्रु बोकेर सोही जहाज काठमाडौँ आएको थियो।

नागरिक उड्डयन प्राधिकरणका उपमहानिर्देशक डीओ चन्द्रलाल कर्णले सिचुवान एयरलाइन्स पोखरामा अवतरण र टेकअफ सहज रूपमै गरेको बताए। योसँगै न्यारोबडी जहाजले नियमित उडान गर्न कुनै समस्या नरहेको उल्लेख गरेको छ।

‘पोखरा विमानस्थल निर्माण गर्दा न्यारोबडी जहाज उडान गर्न सक्ने गरी डिजाइन गरिएको थियो,’ उपमहानिर्देशक कर्णले भने, ‘सिचुवानको पूर्ण क्षमताको उडानले प्राविधिक रूपमा कुनै समस्या नरहेको प्रमाणित गरेको छ।’

नागरिक उड्डयन प्राधिकरणमा महानिर्देशक प्रदीप अधिकारीले डाँडा र धावनमार्गको कारण उडान गर्न नसकिने भन्ने हल्ला झुटो साबित गरेको बताए।

‘पोखरा विमानस्थलमा अन्तर्राष्ट्रिय उडान हुनै सक्दैनन् भन्ने हल्लाको व्यापार अब बन्द भयो,’ महानिर्देशक अधिकारीले भने, ‘हाम्रो मेहेनतले नियमित उडान गर्न सक्छौँ। कसैले डाँडा र कसैले धावनमार्गको कारण अन्तर्राष्ट्रिय उडान हुन सकेनन् भन्ने हल्ला खण्डित भए।’

पोखरामा वार्षिक २ लाख अन्तर्राष्ट्रिय पर्यटक आएका छन् भने आगामी वर्ष ४ लाख पुर्‍याउन सके कम्पनी उडान गर्न आफैँ तयार हुने उनको भनाइ छ।

लामो समयको प्रयासपछि एउटा अन्तर्राष्ट्रिय विमानस्थल निर्माणका सम्पूर्ण प्रक्रिया पूरा गरेर पोखरामा सुविधा सम्पन्न अन्तर्राष्ट्रिय विमानस्थल निर्माण भएर १ जनवरी २०२३ मा उद्घाटन गरिएको थियो। हालसम्म केही चार्टर्ड उडानबाहेक एउटा पनि नियमित अन्तर्राष्ट्रिय उडान हुन सकेको छैन।