डा ओम फाउन्डेसनले छात्रवृत्ति दिने

काठमाडौँ– डा. ओम फाउन्डेसनले गरिब तथा जेहेनदार विद्यार्थीलाई छात्रवृत्ति प्रदान गर्ने भएको छ। छात्रवृत्तिका लागि कक्षा ६ देखि ९ सम्मका विद्यार्थीले माघ १७ देखि फागुन ५ सम्म आवेदन दिनुपर्नेछ।

वरिष्ट मुटुरोग विशेषज्ञ तथा लेखक डा. ओममूर्ति अनिलका अनुसार विद्यार्थी स्वयं वा विद्यार्थीका लागि विद्यालय र अभिभावकले आवेदन दिन सक्नेछन्।

आवेदनमा विद्यार्थीको अघिल्लो कक्षाको ग्रेडसिट, चालू शैक्षिक सत्रका दुई त्रैमासिकको ग्रेडसिट, परिचयपत्र, अन्य कुनै प्रकारको छात्रवृत्ति प्राप्त नगरेको प्रमाण र विद्यार्थीको शैक्षिकस्तरसम्बन्धी विद्यालयको सिफारिस समावेश गर्नुपर्नेछ।

‘पढ्न चाहेका तर आर्थिक स्थिति कमजोर भएकालाई फाउन्डेसनका तर्फबाट सहयोग रहने छ,’ उनले भने।

डा. ओममूर्ति अनिलद्वारा लिखित पुस्तक ‘जीवन्त सम्बन्ध’को बिक्रीबाट प्राप्त रकमले उक्त छात्रवृत्ति प्रदान गर्न लागिएको हो।

‘जीवन्त सम्बन्ध’ पुस्तकको बिक्रीबाट प्राप्त हुने सम्पूर्ण रकम फाउन्डेसनबाट खर्च गरिने उनले जानकारी दिए। स्वास्थ्य, शिक्षा र सामाजिक रूपान्तरणका क्षेत्रमा काम गर्ने उद्देश्यले स्थापित डा. ओम फाउन्डेसनले विभिन्न स्थानमा सातवटा निःशुल्क मुटु स्वास्थ्य शिविर सञ्चालन गरी १६ सय जनाभन्दा बढीको स्वास्थ्य जाँच गरिसकेको छ।

ती शिविरमा ईको, ईसीजी, सुगर, प्रेसरलगायत जाँच गर्नुका साथै आवश्यक औषधिसमेत निःशुल्क प्रदान गरिएको फाउन्डेसनले जनाएको छ।

विपन्न तथा सीमान्तकृत समुदायका ३ सय ५० घरपरिवारलाई कम्बल (ब्ल्यांकेट) समेत वितरण गरिएको बुधबार आयोजित पत्रकार सम्मेलनमा फाउन्डेसनले जानकारी दिएको छ।

स्वदेश र विदेशमा बसोबास गर्ने नेपालीका निम्ति निःशुल्क टेलिमेडिसिन सेवा पनि फाउन्डेसनले प्रदान गर्दै आएको छ।