३० अर्बको ‘एमसीसी प्रसारण लाइन’ बनाउन ६ भारतीय कम्पनी इच्छुक

काठमाडौं- मिलेनियम च्यालेन्ज कम्प्याट (एमसीसी)अन्तर्गत अमेरिकी सरकारको अनुदान सहयोगमा निर्माण हुने प्रसारण लाइनको ठेक्का लिन ६ कम्पनीले इच्छा देखाएका छन्। एमएसीए नेपालले मंसिर १२ गते खुलाएको ४०० केभीए प्रशारण लाइनको बोलपत्रमा ६ कम्पनीले इच्छा व्यक्त गरेका हुन्।

एमसीएले नेपालका अनुसार आवेदन दिने ६ वटै कम्पनी भारतीय हुन्। एमसीए नेपालले आवेदन दिने कम्पनीको उपस्थितिमा बोलपत्र खोलेको थियो।

बोलपत्र दिनेमा मेघा इञ्जिनियरिङ एन्ड इन्फ्रास्ट्रक्चर लिमिटेड र पावर मेक प्रोजेक्ट्स लिमिटेडको संयुक्त, कल्पतरु पावर ट्रान्समिसन लिमिटेड, केईसी इण्टरनेसनल लिमिटेड, ट्रान्सरेल लाइटिङ लिमिटेड, टाटा प्रोजेक्ट्स लिमिटेड र लार्सन एन्ड टर्बो लिमिटेड रहेका छन्।

ती कम्पनीले दिएको आवेदनलाई अध्ययन गरेर प्रशारणलाइनको ठेक्का बाँडफाँट हुने एमएसीए नेपालले जनाएको छ। एमसीएले विभिन्न ३ वटा खण्डमा विभाजन गरी बोलपत्र माग गरेको थियो।

प्रसारण लाइनको कुल अनुमानित लागत २२ करोड ८२ लाख डलर अर्थात् आजको विनियमदर अनुसार ३० अर्ब ११ करोड रुपैयाँ रहेको छ। लप्सीफेदीदेखि रातमाटे हुँदै हेटौँटासम्म, रातमाटेदेखि दमौलीसम्म र दमौलीदेखि बुटवलसम्म गरी तीन खण्डमा विभाजन गरी बोलपत्र आह्वान भएको थियो।

कम्पनीहरुले दिएको टेक्लिकल तथा फाइनान्सियल रिपोर्ट अध्ययनका आधारमा तीन वटा खण्डका लागि छुटाछुटै तीन कम्पनी वा एउटै कम्पनी ठेक्का लगाउने भन्ने विषय एमसीए नेपालले तय गर्ने बताइएको छ।

आवेदन दिएका कम्पनीहरुको प्राविधिक तथा वित्तीय पाटो अध्ययन गरी आगामी १.५ देखि २ महिनाभित्रमा ठेक्का दिने तयारी गरिएको एमसीए नेपालले जनाएको छ। बोलपत्रमा निवेदनका दिएका मध्ये कति कम्पनी छनौट हुने भन्ने अहिलेसम्म यकिन भैसकेको छैन। तीनवटा खण्डका लागि ६ कम्पनीले आवेदन दिएकाले कतिवटा कम्पनीलाई ठेक्का दिने भन्ने हालसम्म टुंगो लागेको छैन।

कम्पनीहरुले दिएको टेक्लिकल तथा फाइनान्सियल रिपोर्ट अध्ययनका आधारमा तीन वटा खण्डका लागि छुटाछुटै तीन कम्पनी वा एउटै कम्पनी ठेक्का लगाउने भन्ने विषय एमसीए नेपालले तय गर्ने बताइएको छ।

एमसीसी परियोजना अन्तर्गत एमसीए नेपालले गर्ने ४०० केभिए क्षमताको ३ सय १५ किलोमिटर लामो प्रशारण लाइन मुख्य परियोजना हो। राजनीतिकरुपमा निकै लामो रसाकसी पश्चात गत वर्ष प्रतिनिधिसभाले पारित गरेपछि उक्त परियोजना निर्माणको बाटो खुलेको थियो। संसदबाट एमसीसी परियोजना पास भएपश्चात एमसीए नेपालले परियोजना निर्माण प्रक्रिया अगाडि बढाएको छ।

सोमबार खुलाइएका बोलपत्र आवेदनका आधारमा ठेक्का प्रदान गरी आगामी भदौबाट काम अगाडि बढाउने तयारीमा एमसीए नेपाल छ। आगामी ४ वर्षभित्र परियोजना निर्माण सम्पन्न गर्नैपर्ने दबाबमा एमसीए नेपाल छ। एमसीसी कम्प्याक्टमा नै ४ वर्षभित्र आयोजना सम्पन्न गर्ने सर्त राखिएको छ।