भद्रगोल बजेट ल्याएको भन्दै विरोध चर्किएपछि रोकियो बागमती प्रदेशसभा बैठक

मकवानपुर- बागमती प्रदेशसभाको बैठक सारिएको छ। बिहीवार बिहान ११ बजे बस्ने भनिएको बैठक असार १६ गते दिउँसो १ बजेका लागि सारिएको हो।

प्रदेशसभाका सभामुख भुवनकुमार पाठकले सत्तापक्ष र प्रतिपक्ष दलसँगको सहमतिअनुसार असार १६ गते दिउँसो १ बजे बैठक बस्नेगरी सबै सांसदलाई सूचना सम्प्रेषण गरिएको बताए।

गत असार १ गते प्रदेशसभाको बैठकमा आर्थिक मामिला तथा योजनामन्त्री कुन्दनराज काफ्लेले पेस गरेको बजेट भद्रगोल भएको र त्यसको विरोधमा कांग्रेसकै सांसदहरू उत्रिएपछि बैठक सारिएको हो।

हेटौँडामा उपमहानगरपालिकामा १९ वटा मात्र वडा छन्। तर काफ्लेले ल्याएको बजेटमा २० र २२ नम्बर वडालाई जोड्न बजेट विनियोजन गरिएको छ।

काफ्लेले ल्याएको बजेटमा बागमतीका मात्र योजना पनि छैनन्। गण्डकीका केही योजनाका लागि पनि विनियोजन गरिएको छ।

यसैबीच कांग्रेसकै सांसदहरूले बिचौलियाको स्वार्थमा बजेट ल्याइएको बताए। सरकारकोतर्फबाट आगामी आव २०८२/८३ का लागि बजेट विनियोजित गरिँदा निष्पक्ष र पारदर्शी नभएको भन्दै सत्तापक्ष दलले समेत प्रतिरोध गरेपछि बैठक नियमित बस्न सकेको छैन।

हुँदै नभएका वडा खडा गरेर बागमतीले ल्यायो बजेट, कांग्रेसकै सांसद भन्छन्- बिचौलिया हाबी भए