प्रधानमन्त्री प्रचण्डलाई बुझाइयो लगानी बोर्डको वार्षिक प्रतिवेदन

काठमाडौं– प्रधानमन्त्री पुष्पकमल दाहाल प्रचण्डले लगानी बोर्डलाई चुस्त, प्रभावकारी तथा विज्ञहरूको ज्ञान एवं अनुभवलाई कार्यान्वयनमा लैजान सक्ने सक्षम संस्थाको रूपमा विकास गरिने बताएका छन्। आज बिहान लगानी बोर्डको कार्यालयबाट सम्पादन भएका कार्यविवरणसहितको वार्षिक प्रतिवेदन ग्रहण गर्दै प्रधानमन्त्रीले प्रचण्डले यस्तो बताएका हुन्।

बोर्डका प्रमुख कार्यकारी अधिकृत सुशील भट्टले आव २०७९/८० मा सम्पादन भएका कार्यसहितको प्रतिवेदन प्रधानमन्त्रीसमक्ष प्रस्तुत गरे। सार्वजनिक–निजी साझेदारी तथा लगानी ऐन र नियमावलीबमोजिम प्रत्येक आर्थिक वर्षको सुरुआतमा बोर्ड अध्यक्ष रहेका प्रधानमन्त्रीसमक्ष कार्यकारी अधिकृतले प्रतिवेदन पेस गर्ने र बोर्ड अध्यक्ष र प्रमुख कार्यकारी अधिकृतबीच कार्य सम्पादन करार गर्नुपर्ने व्यवस्थाबमोजिम प्रतिवेदन प्रस्तुत गरिएको हो।

प्रधानमन्त्री प्रचण्डले लगानी बोर्डलाई चुस्त, प्रभावकारी तथा विज्ञहरूको ज्ञान एवं अनुभवलाई कार्यान्वयनमा लैजान सक्ने सक्षम संस्थाको रूपमा विकासका लागि आवश्यक पर्ने नीतिगत, कानुनी तथा संस्थागत सुधारको खाका प्रस्तुत गर्न कार्यकारी अधिकृतलाई निर्देशन दिए।

संस्थालाई तुलनात्मक रूपले थोरै तर रणनीति पूर्वाधारमा परियोजना निर्माणमा ‘की इन्स्टिच्युट’का रूपमा विकास गर्ने सोच वर्तमान सरकारको रहेको बताउँदै बोर्डले गरेको कार्य प्रगतिले संरचना तयार भइसकेको विश्वास उनले व्यक्त गरे।

प्रधानमन्त्रीले लगानी बोर्डलाई नयाँ उचाइ दिएर राष्ट्रको समृछि र विकासमा योगदान दिन आग्रह गरे। आगामी वर्ष पनि विगतमा जस्तै प्रभावकारी कार्य सम्पादन गर्न निर्देशन दिँदै उनले आफ्नो तर्फबाट आवश्यक सहयोग रहने बताए।

प्रधानमन्त्री प्रचण्डले गत आवमा बोर्डबाट भएका कार्यले देशमा ठूला पूर्वाधार निर्माणमा प्रत्यक्ष वैदेशिक लगानी (एफडीआई) सहित निजी क्षेत्रको लगानी भित्र्याउन सकिने र पूर्वाधार विकासमा निजी लगानीलाई प्रोत्साहित गर्न सरकार प्रतिबद्ध रहेको धारणा व्यक्त गरे।

परियोजना विकासमा बोर्डले अपनाएको स्क्रिनिङ प्रक्रिया वैज्ञानिक तथा समयसापेक्ष भएको र अब परियोजनाको पहिचान र स्ट्रक्चरिङमा सम्बन्धित मन्त्रालयबाट सहयोग लिई सार्वजनिक/निजी/साझेदारी (सानिसा) परियोजना बैंकलाई उपयोगी बनाउन सहयोग मिल्ने प्रधानमन्त्री प्रचण्डले बताए। बोर्डको समन्वयमा सम्बन्धित मन्त्रालय तथा प्रदेश सरकारबाट समेत सहयोग लिन सकिने उनले सुझाए।

प्रतिवेदन पेस गर्दै बोर्ड अध्यक्ष सुशील भट्टले गत आवमा संस्थाको म्यान्डेट, बोर्डको व्यावसायिक योजनासहितको रणनीतिक योजना तथा सरकारको बजेट तथा कार्यक्रमको अधीनमा रही विभिन्न समयमा प्रधानमन्त्रीबाट प्राप्त निर्देशनसमेतका आधारमा सम्पन्न कार्यप्रगतिबारे विस्तृत प्रतिवेदनमा प्रस्तुत गरिएको बताए। प्रतिवेदनमा सम्झौताबमोजिमका विषयमा चार खम्बे रणनीतिबमोजिम परियोजना व्यवस्थापन, लगानी प्रवद्र्धन, संस्थागत विकास र समन्वय, सहकार्य र साझेदारीअन्तर्गतका कार्य प्रस्तुत गरिएको छ।