थापा सरकारलाई अर्को संकट, कोशीमा ‘बजेट होलिडे’

काठमाडौं- कोशी प्रदेश बजेट होलिडे सुरु भएको छ। निवर्तमान सरकारले अध्यादेशबाट आएको बजेट प्रतिस्थापन गर्ने विधेयक पनि दर्ता नहुँदा र उक्त अध्यादेश बजेटलाई अनुमोदन पनि नहुँदा प्रदेशमा बजेट होलिडे सुरु भएको हो।

गत असार १४ गते एमाले नेतृत्वमा रहेको सरकारले अध्यादेशबाट बजेट ल्याएको थियो। उक्त अध्यादेश ६० दिनभित्र अनुमोदन गरिसक्नुपर्ने थियो। तर सरकारले न त उक्त अध्यादेश अनुमोदन गराउने काम गर्‍यो न त प्रतिस्थापन विधेयक नै ल्यायो। यसले प्रदेश सभामा होलिडे सुरु भएको हो।

कोशी प्रदेशमा बजेट होलिडे सुरु भएपछि प्रमुख प्रतिपक्षी दल नेकपा एमाले अदालत जाने तयारीमा छ। आफू नेतृत्वको सरकारले ल्याएको बजेटलाई प्रतिस्थापन विधेयकलाई अनुमोदन गराउनुपर्ने एमालेको भनाइ रहँदै आएको छ।

बजेट शून्यताले कर्मचारीको तलब भत्तादेखि निजी क्षेत्रसँगको साझेदारीमा चल्ने कार्यक्रमसमेत प्रभावित हुनेछन्।

प्रदेशमा बजेट होलिडे सुरु भएपछि कांग्रेस नेतृत्वको उद्धव थापा सरकारलाई अर्को संकट आइपरेको छ। यद्यपि उनलाई दीर्घकालीन असर पुग्ने गरी काम/निर्णय नगर्न सर्वोच्च अदालतले आदेश दिइसकेको छ। पहिलो पटक सभामुखको समेत समर्थन लिएर मुख्यमन्त्रीमा नियुक्ति लिएको र दोस्रो पटक प्रदेशको अध्यक्षता गर्ने व्यक्तिको समेत विश्वासको मत लिएको भन्दै उनी पछिल्लो समय निरन्तर विवादमा छन्।

सुरुमा असार २१ गते मुख्यमन्त्रीमा नियुक्ति लिएका थापा साउन ११ गते पदमुक्त भएका थिए। त्यसपछि फेरि साउन १६ गते मुख्यमन्त्रीमा नियुक्त भएका थिए। सर्वोच्चको आदेश अनुसार भदौ ८ गते थापा सरकार फेरि कामचलाउको हैसियतमा पुग्यो।