पारो-पोखरा व्यावसायिक उडान भर्दै ‘ड्रुक एयर’

काठमाडौँ- भुटानको ‘ड्रुक एयर’ पोखरा अन्तर्राष्ट्रिय विमानस्ठलमा व्यवासायिक उडान गर्ने भएको छ। ड्रुकले भुटानको पारो अन्तर्राष्ट्रिय विमानस्थलबाट पोखरामा अन्तर्राष्ट्रिय उडान भर्ने भएको हो।

नागरिक उड्डयन प्राधिकरणका अनुसार उक्त एयरले पोखरादेखि पारोमा हप्तामा ७ उडान गर्नेछ। प्राधिकरणका सूचना अधिकारी ज्ञानेन्द्र भुलले हप्तामा ७ वटा फ्लाइट गर्ने गरी ड्रुक एयरले अनुमति पाएको जानकारी दिए।

यसअनुसार एयरले पहिलो उडान सेप्टेम्बर ९ का दिन गर्नेछ। उनका अनुसार भुटानको ड्रुक एयर पोखरामा व्यावसायिक उडान गर्ने पहिलो अन्तर्राष्ट्रिय एयरलाइन्स बन्ने छ। यसअघि, चीनको सिचुवान एयरलायन्सले जुन २१ मा पोखरामा चार्टड फ्लाइट गरेको थियो।

चिनियाँ एक्जिम बैंकसँग झन्डै २२ अर्ब रुपैयाँ ऋण लिएर निर्माण भएको यस विमानस्थल निर्माण भएपनि व्यावसायिक रूपमा सञ्चालन हुन सकेको छैन। बैंकको कुल ऋणमध्ये ७५ प्रतिशत रकममा २ प्रतिशत ब्याजदर छ भने २५ प्रतिशत ऋण रकमको ब्याज चीन सरकारले व्यहोर्ने शर्त छ।

झन्डै ३७ सय रोपनी क्षेत्रफलमा निर्माण भएको विमानस्थल अन्तर्राष्ट्रिय नागरिक उड्डयन संस्था (आईकाओ) को मामदण्डअनुसार ४ ‘डी’ मोडलमा निर्माण गरिएको छ।

यस विमानस्थलमा बोइङ ७५७ र एयरबस ३२० का जहाज अवतरण हुन सक्छन्। विमानस्थलको धावनमार्गको लम्बाइ २५ सय मिटर र रन वेको चौडाइ ४५ मिटर रहेको छ।

विमानस्थलका लागि सरकारले २०३२ मा ३ हजार १ सय ६ रोपनी जग्गा अधिग्रहण गरेको थियो। तर, त्यतिले नपुगेपछि ६ सय २९ रोपनी जग्गा थप अधिग्रहण गरिएको थियो।

जुलाई २०२१ सम्ममा सञ्चालनमा ल्याउने लक्ष्क्षसहित निर्माण गरिए पनि कोरोना महामारीका कारण डेढ वर्षपछि धकेलिएको यो विमानस्थलमा व्यावसायिक उडान हुन नसकेको अवस्थामा भुटानबाट हुने व्यावसायिक चार्टड फ्लाइटले आस जगाएको छ।

ड्रुक एयर भुटानको रोयल एयरलाइन्स अन्तर्गतको हवाई कम्पनी हो। यो एयर आजभन्दा ४२ वर्षअघि सन् १९८१ मा स्थापना भएको थियो।

यस्तै, हाल यो एयरले १३ स्थानमा व्यावसायिक उडान भर्दै आइरहेको छ। सुरुमा पारो–पोखरा उडान भरे पनि विस्तारै पोखरा–दिल्ली–पारो उडान भर्ने कम्पनीको योजना रहेको बताइएको छ।