सञ्चो अस्पतालका डाक्टर कुटेको आरोपमा ४ जना पक्राउ

काठमाडौँ- हेटौंडाको सञ्चो अस्पतालका दुई डाक्टरलाई कुटपिट गरेको आरोपमा चार जना पक्राउ परेका छन्।

पक्राउ पर्नेमा हेटौंडा उपमहानगरपालिका-१२ पदमपोखरीकी रमा प्रधान, रमिता प्रधान, रोहित प्रधान र अनुप प्रधान रहेका छन्।

उनीहरू चितवन मेडिकल कलेजमा उपचारको क्रममा साउन २५ गते मृत्यु भएका ४२ वर्षीय राजेश प्रधानका नातेदार हुन्। रमा श्रीमती, रमिता छोरी, रोहित छोरा र अनुप भतिजा हुन्।

मकवानपुर प्रहरी प्रमुख प्रहरी उपरीक्षक सीताराम रिजालका अनुसार उनीहरूलाई बिहीबार पक्राउ गरिएको हो। बुधबार बिहान १० बजे सञ्चो अस्पतालका डाक्टर विकास थापा र प्रशान्त बिडारीमाथि कुटपिट भएको थियो।

कुटपिट भएपछि डाक्टरद्वयले प्रहरीमा उजुरी गरेका थिए। उजुरीपछि अनुसन्धानका लागि प्रहरीले आरोपीहरूलाई पक्राउ गरेको रिजालले बताए।

डेंगु र निमोनियाबाट पीडित राजेश साउन २२ गते सञ्चो अस्पतालमा भर्ना भएका थिए। भोलिपल्ट उनलाई अस्पतालले चितवन मेडिकल कलेजमा रिफर गरेको थियो।

साउन २५ गते उनको मृत्यु भएपछि काजकिरिया सकेर परिवारका सदस्यहरू बुधबार सञ्चो अस्पतालमा पुगेका थिए। सुरूवाती उपचारमा लापरबाही गरेको आरोप लगाउँदै उनीहरूले डाक्टरमाथि कुटपिट गरेका थिए।

कुटपिटबाट थापाको अनुहारको हड्डी भाँचिएको छ। बिडारीको दुबै आँखाको बाहिरी भागमा चोट लागेको छ।