भूमिगत तार बिछ्याउने काम काठमाडौंमा ‘तीव्र’, भक्तपुर र ललितपुरमा सुस्त

काठमाडौँ- काठमाडौंमा भूमिगत तार बिच्छ्याउने कामले गति लिएको छ। गत २०७६ फागुन २७ मा तत्कालीन प्रधानमन्त्री केपी शर्मा ओलीले तामझामका साथ सुरु गरेको भूमिगत तार बिछ्याउने काम २०८० मा आएर बल्ल गति लिन थालेको हो।

विद्युत्तीय र सेवा प्रदायक कम्पनीका तारहरु जमिनमुनि वा भूमिगत रुपमा बिच्छ्याउने काम भइरहेको हो।

काठमाडौंमा महाराजगञ्ज, रत्नपार्क र बानेश्वर वितरण केन्द्र गरी तीन प्याकेजमा काम भइरहेको छ।

नेपाल विद्युत् प्राधिकरणले पहिलो चरणमा अघि बढाएको महाराजगञ्ज वितरण केन्द्रअन्तर्गत भूमिगत तार व्यवस्थापनको काम करिब अन्तिम चरणमा पुगेको छ।

प्राधिकरणअन्तर्गत भूमिगत तार व्यवस्थापनका आयोजना प्रमुख सुमन श्रेष्ठले रत्नपार्क वितरण केन्द्रअन्तर्गत ७० प्रतिशत भूमिगत तारको काम सम्पन्न भएको बताए। करिब ६३० किलोमिटरमध्ये ४५० किलोमिटर क्षेत्रमा तार भूमिगत गर्ने काम सकिएको उनको भनाइ छ।

उक्त खण्डमा ११ केभी र ४०० केभी क्षमताको विद्युतीय तार भूमिगत गरिसकिएको उनले बताए। रत्नपार्क वरिपरिको क्षेत्रमा पनि भूमिगतको काम बाँकी छ। खासगरी बागबजार, पुतलीसडक, न्युरोड, जमल, लैनचौरलगायत ठाउँमा भूमिगतको काम अघि बढ्न सकेको छैन।

महाराजगञ्ज वितरण केन्द्रअन्तर्गत ७५ प्रतिशत भूमिगत तार बिच्छ्याउने काम सकिएको आयोजना प्रमुख अभिषेक अधिकारीले बताए। चक्रपथ, बालुवाटार, सुकेधारलगायतका केही ठाउँमा बाँकी रहे पनि अन्यक्षेत्रमा तार भूमिगत गरिसकिएको छ।

बानेश्वर वितरण केन्द्रअन्तर्गत र अन्य क्षेत्रमा ४५ प्रतिशत भूमिगत तार व्यवस्थापन भइसकेको आयोजना प्रमुख पीयुष मालाकारले बताए। उनका अनुसार कीर्तिपुर, जडीबुटी क्षेत्रमा तार भूमिगत गर्ने काम करिब सकिएको छ। कालीमाटीदेखि बल्खुखण्डको तार भूमिगतको काम पनि अन्तिम चरणमा पुगेको छ।

अहिले कालीमाटी–कंलकी हुँदै कलंकीदेखि थानकोटसम्मको तार भूमिगतको काम भइरहेको छ। अहिले त्रिपुरेश्वरदेखि टेकुसम्म तार भूमिगत गर्ने काम सम्पन्न भइसकेको छ। माइतीघर, थापाथली, तीनकुने, एयरपोर्ट क्षेत्रमा पनि तार भूमिगत गर्ने काम अघि बढ्न सकेको छैन।

काठमाडौंमा केही हदसम्म तार भूमिगत गर्ने कामले गति लिए पनि ललितपुर र भक्तपुरमा भने निकै सुस्त छ। आयोजना प्रमुख सुमन श्रेष्ठका अनुसार, भक्तपुर र ललितपुरमा हालसम्म १५ देखि २० प्रतिशतमात्र भूमिगत तार व्यवस्थापनका काम सम्पन्न भएको छ।

ती दुई जिल्लाका धेरैजसो क्षेत्रमा अझै पनि भूमिगत तार बिच्छ्याउने काम सुरु हुन सकेको छैन। काठमाडौं उपत्यकामा साढे २ वर्षभित्र तार भूमिगतको काम सम्पन्न गर्ने लक्ष्य लिए पनि कोरोना महामारीलगायतका कारणले ढिला भइरहेको प्राधिकरणले जनाएको छ।

कोरोना कालमा भूमिगत तार बिछ्याउने काम अवरुद्ध भएपछि सरकारले उक्त कार्यक्रमका लागि १५ महिना म्याद थप गरेको थियो। तर, थपिएको समयसीमा २०७९ माघसम्म सम्पन्न गर्नुपर्ने थियो।

कोरोना महामारीसँगै सडक विभागबाट अनुमति लिनुपर्नेलगायत कारणले काम समयमै सम्पन्न गर्न नसकेको प्राधिकरणको भनाइ छ।

काठमाडौँभित्र विद्युतीय तार भूमिगत गर्ने जिम्मा भारतीय ठेकेदार कम्पनी केइआई इन्ड्रस्ट्रिज लिमिटेडले पाएको छ।

कुल ७ अर्ब लागत अनुमान गरिएको यस आयोजना निर्माणमा भइरहेको ढिलाइका कारण लागत‍ पनि बढिरहेको छ।