५ हजारलाई रोजगारी र १५ हजारलाई सिपमूलक तालिम दिन काठमाडौँ महानगरले ल्यायो योजना

काडमाडौँ– काठमाडौँ महानगरपालिकाले हरेक वर्ष कम्तीमा ५ हजारलाई रोजगारी दिने योजना ल्याएको छ।

महानगरका मेयर बालेन्द्र साहले फेसबुकमा स्टाटस लेख्दै प्रतिवर्ष १५ हजार जनालाई रोजगारीमूलक तालिम पनि दिने योजना ल्याएको जानकारी दिएका हुन्।

‘हरेक वर्ष कम्तीमा १५ हजार जनालाई सीपमूलक तालिम दिने र कम्तीमा ५ हजार नयाँ रोजगारी सृजना गर्ने लक्ष्यका साथ रोजगारी र आयवृद्धि काठमाडौँको समृद्धि गौरब योजना ल्याइएको हो,’ महानगर मेयर बालेन्द्रको स्टाटसमा उल्लेख छ।

महानगरको बेरोजगारी समस्यालाई ३ वर्षभित्र समाधान गर्ने महानगरको लक्ष्य छ। महानगरले यसलाई रोजगारी र आयवृद्धि काठमाडौँको समृद्धि गौरव योजना तथा श्रम बैंक स्वर्णिम योजना नाम दिएको छ।

महानगरमा रहेका दक्ष, अर्धदक्ष तथा अदक्ष कामदार र रोजगारदाताहरूलाइ एउटै प्लेटफर्ममा ल्याउन उसले श्रम बैंकसमेत स्थापना गरेको छ।

महानगरका स्थायी बासिन्दा, महानगरका करदाताहरु तथा महानगरभित्र भाडामा बस्ने नेपाली नागरिक श्रम बैंकमा आबद्ध हुन सक्ने महानगरको भनाइ छ।

श्रम बैंकमा आबद्द दक्ष कामदारलाई अन्तर्वार्ता लिएर सोझै काममा लगाउने महानगरको योजना छ। अर्धदक्ष जनशक्तिलाइ सीप स्तरोन्नति तथा प्रमाणीकरण गरी काममा लाउने उसको योजना छ।

अदक्ष कामदारलाई सीपयुक्त जनशक्ति निर्माण गरी रोजगार तथा स्वरोजगार बनाउने योजना महानगरले अघि सारेको छ।

श्रम बैंकमा आबद्द जनशक्ति महानगरभित्रका पूर्वाधार विकास, वातावरण संरक्षण, सरसफाई, सामाजिक विकास लगाएत का क्षेत्रहरुमा आन्तरिक व्यवस्थापनमा काम दिने योजना महानगरले बनाएको छ।

यस्तै महानगरका सरकारी निकाय, गैरसरकारी संघसंस्था, निजी कम्पनी, संघसंस्था, अन्तराष्ट्रिय संघसंस्थामा समेत रोजगारी दिने योजना महानगरको छ।

महानगरको श्रम बैंक एप मार्फत पार्ट टाइम जबका रुपमा सबै सेवाहरु घण्टाका आधारमा तथा पटके रुपमा गराउने उसको योजना छ।

महानगरसँग आवद्ध भएर रोजगार भएका कामदारहरुलाई अनिवार्य रूपमा कार्यस्थल बिमा हुने समेत उसले बताएको छ।

अर्धदक्ष तथा अदक्षका लागि १५ स्थानमा ट्रेनिंग सेन्टरको स्थापना गरी बाह्रै महिना बिहानदेखि साँझसम्म नियमित रूपमा तालिम संचालन गरिने पनि बालेनले जानकारी दिएका छन्। त्यसका लागि बजारको आवश्यकता पहिचान गरी पाठ्यक्रम पनि निर्माण गरिरहेको जानकारी बालेनले दिएका छन्।

श्रम बैंकमा आबद्ध हुन चाहनेले यो लिंकमा क्लिक गरी फारम भरी आवेदन दिन सक्नेछन्। सिप विकास तालिम लिनका लागि यो लिंकमा क्लिक गरी आवेदन दिन सकिने व्यवस्था गरिएको छ।

यसका साथै काठमाडौ महानगरपलिका कार्यलय तथा वडा कार्यलयहरुमा सम्पर्क राखेर पनि आवेदन फारम दिन सकिने व्यवस्था गरिएको छ।

यसका साथै महानगरभित्र संचालित जब एजेन्सी र तालिम प्रदायक संस्थाहरुको नियमित अनुगमनसमेत गरिने महानगरले जानकारी दिएको छ।