१५ सय मेगावाट बिजुली निकाल्न १६ आयोजनामा अध्ययन जारी [सूचीसहित]

काठमाडौँ-  विद्युत् विकास विभागले १६ वटा जलविद्युत् आयोजना निर्माणका विषयमा अध्ययन गरिरहेको जानकारी दिएको छ।

देशका विभिन्न ठाउँमा साना-ठूला यी आयोजनाबाट १५ सय मेगावाट बिजुली निकाल्नका सकिने प्रारम्भिक अध्ययनले देखाएको छ। यी आयोजना निर्माणका विषयमा थप अध्ययन भइरहेको विभागले जानकारी दिएको हो।

निर्माणको चरणमा जानका लागि १६ वटा जलविद्युत् आयोजनाहरुबारे अध्ययन भइरहेको विभागका चिरञ्जीवी चटौतले जानकारी दिए। उनका अनुसार यी १६ वटै आयोजनाको अध्ययन दुई वर्षभित्र सम्पन्न गर्ने लक्ष्य छ।

निर्माण सुरु भएको ७ वर्षभित्र विद्युत् उत्पादन थाल्न सकिने विभागको प्रक्षेपण छ। अध्ययन भइरहेका १६ आयोजनामा अधिकांश कर्णाली र सुदुरपश्चिममा पर्छन्। कतिपय हिमाली क्षेत्रमा पनि विद्युत उत्पादन गर्न सकिने आयोजना यसमा समावेश छन्।

विभागका अनुसार गोरखामा १२०० मेगावाट क्षमताको बुढीगण्डकी जलविद्युत् आयोजनाबारे अध्ययन भइरहेको छ।

हुम्लामा ४९.५ मेगावाटको लोती कर्णाली(धर्मा) जलविद्युत् आयोजनाका विषयमा पनि अध्ययन जारी छ।

सुर्खेतको वीरेन्द्रनगरमा भेरी बबई डाइभर्सनबाट ४८ मेगावाट बिजुली निकाल्ने योजना छ।

सोलुखुम्बुमा ४७ मेगावाटको दूधकोशी चौथो जलविद्युत् आयोजना र संखुवासभामा ४०.८२० मेगावाटको संखुवासभा खोला–१ जलविद्युत आयोजनाको अध्ययन भइरहेको विभागको भनाइ छ।

हुम्लामा ३० मेगावाटको कवादी खोला, जुम्लामा १७.५५० मेगावाटका जवाखोला जलविद्युत्, म्याग्दीमा १५.२ मेगावाटको म्याग्दीखोला जलविद्युत् आयोजना, ताप्लेजुङ १२.५०४ मेगावाटको मैयाखोला जलविद्युत् र लमजुङमा ८.७४० मेगावाटाको तल्लो चेपेखेला जलविद्युत् आयोजनाको अध्ययन कार्य जारी छ।

त्यस्तैगरी, ८.६२५ मेगावाटको रुपगाढ जलविद्युत्, जुम्लामा ५ मेगावाट क्षमताको भेरीखोला, रोल्पामा ४.४०० मेगावाटको लुङ्ग्री खोला जलविद्युत्, जुम्लामा ४.०१५ मेगावाटको न्याउरीगाढ जलविद्युत्, डडेल्धुरामा २.५२० मेगावाटको डोटीगाढ जलविद्युत् र मुस्ताङमा ०.४५० मेगावाट क्षमताको मुस्ताङ विन्ड पावर अध्ययनको चरणमा रहेको विभागले जनाएको छ।