उद्योग वाणिज्य महासंघको मतदान सम्पन्न, राति १२ बजेसम्म नतिजा घोषणा गर्ने तयारी

काठमाडौं– नेपाल उद्योग बाणिज्य महासंघको वरिष्ठ उपाध्यक्षसहित नयाँ कार्यसमिति चयन गर्नका लागि मतदान सम्पन्न भएको छ। बुधबार बिहान ८ बजेदेखि दिउँसो ४ बजेसम्म तोकिएको मतदानमा जिल्लानगर र वस्तुगततर्फ सबै मतदाताहरुले मतदान गरेका हुन्।

जिल्लानगर र वस्तुगततर्फको निर्वाचन ४ बजे नै सकिएको निर्वाचन अधिकृत लिलामणी पौडेलले जानकारी दिए। बिहान २ घण्टा ढिला गरी निर्वाचन सुरु भएकाले एसोसियट्सतर्फ मतदान नसकिएकाले २ घण्टा समय थपिएको थियो। ६ बजेसम्म एसोसियट्सतर्फका मतदाताहरुले मतदान गरेका थिए।

जिल्ला नगर र वस्तुगततर्फ सबै मतदाताले मतदान गरेपनि एसोसियट्सतर्फ भने करिब १५० देखि १६५ कम मत खसेको प्रारम्भिक अनुमान गरिएको छ। एसोसियट्सतर्फ कुल १७४८ मत रहेको छ भने वस्तुगततर्फ १२३ र जिल्लानगरतर्फ ११७ मत रहेको छ।

महासंघको कार्यसमिति सदस्यमा चार जना सर्वसम्मत निर्वाचित भइसकेका छन्। एक वरिष्ठ उपाध्यक्ष, तीन उपाध्यक्ष र ५९ जना कार्यसमिति सदस्य चयन गर्न मतदान सम्पन्न भएको छ।

महासंघको विधानअनुसार हालका वरिष्ठ उपाध्यक्ष चन्द्रप्रसाद ढकाल ३० चैतदेखि स्वतः महासंघको अध्यक्ष बन्दैछन्। प्रत्येक तीन वर्षमा साधारणसभाबाट नयाँ नेतृत्व चयन गर्ने व्यवस्था महासंघ विधानमा छ।

वरिष्ठ उपाध्यक्ष बन्नका लागि चुनावी मैदानमा उमेशलाल श्रेष्ठ, अन्जन श्रेष्ठ र रामचन्द्र संघई छन्। उनीहरूले प्यानल नै खडा गरी चुनावी मैदानमा होमिएका थिए।

उमेशलाल प्यानलबाट जिल्ला नगर उपाध्यक्ष बन्न उम्मेदवारी दिनेमा दिनेश श्रेष्ठ छन्। वस्तुगत उपाध्यक्षका लागि हेमराज ढकाल उम्मेदवार छन्। यो प्यानलमा एसोसिएट्स उपाध्यक्षमा भरत आचार्य उम्मेदवार बनेका थिए।

ज्योत्स्ना श्रेष्ठ रामचन्द्रको प्यानलमा एसोसियट उपाध्यको उम्मेदवार बन्न पुगेकी थिइन्। संघई प्यानलमा जिल्लानगर उपाध्यक्षमा सुरकृष्ण वैद्य र वस्तुगततर्फ सकुन्तलाल हिराचनले उपाध्यक्ष पदका लागि प्रतिस्पर्धामा छन्।

अञ्जनको टिमबाट वस्तुगततर्फ मनिषलाल प्रधान, एसोसियटमा भरतलाई नै अञ्जनको समर्थन छ। जिल्ला/नगरतर्फको अरुणराज सुमार्गी उपाध्यक्षका प्रत्यासी छन्।

सात प्रदेशबाट निर्वाचित हुने ७ जना कार्यसमिति सदस्य पदका लागि १७ जना प्रतिस्पर्धामा छन्। कोशी सदस्यका लागि टंकप्रसाद दुलाल, नरेन्द्रकुमार खड्का र तारानाथ घिमिरेबीच प्रतिस्पर्धा हुँदैछ। मधेशबाट विजयकुमार साह र अरुणकुमार प्रधान उम्मेदवार छन्।

मतदात सकिएकाले आजै १२ बजेभित्र मतगणना सम्पन्न गरी नतिजा दिने तयारी रहेको मतदान अधिकृत पौडेलले बताए।